Вучыцца Валянцін у дзесятым класе Гродзенскай школы-інтэрната для дзяцей з парушэннямі зроку. У шасцігадовым узросце ён пачаў асвойваць фартэпіяна, пасля вывучыў нотную грамату для сляпых па Брайлю. Затым стаў займацца баянам; першым яго настаўнікам быў беларускі музыкант і паэт Віктар Кудлачоў. Сёння хлопец можа сыграць праграму працягласцю паўтары гадзіны на прафесійным пяцірадным баяне. Гэтым музычныя захапленні таленавітага Валянціна не абмяжоўваюцца: ён грае на трубе ў школьным духавым аркестры. Яшчэ піша вершы на беларускай, рускай і польскай мовах. Юнак атрымаў запрашэнне на міжнародны творчы конкурс у Любліне, які адбудзецца восенню. Фестываль для асоб з абмежаванымі магчымасцямі здароўя ў расійскай сталіцы адбыўся пры падтрымцы Міністэрства спорту, турызму і маладзёжнай палітыкі РФ. У ім удзельнічалі таленты з Расіі, Беларусі, Украіны, Азербайджана, Арменіі. Мэтай яго з'яўляецца абмен вопытам работы па сацыяльнай абароне і інтэграцыі маладых людзей з фізічнымі недахопамі, выяўленне адоранай моладзі з асаблівасцямі здароўя. Арганізатары паставілі задачу пашырыць міжнароднае партнёрства ў падтрымцы такіх людзей, лепшай рэалізацыі іх талентаў. Сярод намінацый: "Вакал", "Інструментальная творчасць", "Дэкаратыўна-прыкладное мастацтва", "Танец", "Выяўленчае мастацтва", "Акцёрскае майстэрства".
А.Б.