Іван Хруцкі — наш вялікі зямляк
Калі мы згадваем імя Івана Хруцкага, на памяць адразу ж прыходзяць яго бліскучыя нацюрморты, а ўжо потым — партрэты, інтэр’еры, пейзажы. Хаця і ў гэтых жанрах ён быў самым дасканалым майстрам. Выдатны беларускі жывапісец, ён унёс вялікі ўклад і ў выяўленчую культуру Расіі. І гэты, канешне, бясспрэчны факт амаль што на цэлае стагоддзе, дзякуючы расійскім гісторыкам мастацтва, “ператварыў” нашага Хруцкага ў чыста “рускага мастака”. Сёння, дзякаваць Богу, усё стала на месца, і гэта прызнана ва ўсім культурным свеце: Іван Фаміч Хруцкі — беларускі мастак, імя якога ўнесена ў Спіс памятных дат UNESCO 2010 года. І ў сувязі з 200-годдзем з дня яго нараджэння 8 лютага ў Нацыянальным мастацкім музеі Беларусі пройдуць святочныя ўрачыстасці.