Кіраўнік аб’яднання Наталля Кавалеўская ўзгадала, як марозным зімовым днём у Касцюкоўскі сельскі дом культуры прыйшлі 23 ініцыятыўныя асобы — жыхары гэтай вёскі, кіраўнікі Польскага дома ў Барысаве і яўрэйскай абшчыны “Свет меноры”. Ідэя стварэння аб’яднання, якую доўга выношвала дырэктар ДК Наталля Тупік, была ўхвалена і падтрымана.
Сёння ў складзе “Шматгалосся” — 45 чалавек 14-ці нацыянальнасцей. Найстарэйшай яго ўдзельніцы — 75 гадоў, самай малодшай — 14.
Аб’яднанне мае некалькі секцый па розных накірунках мастацкай творчасці — сольных выканаўцаў, паэтаў-песеннікаў, майстроў народнай творчасці, клуб аматараў нацыянальных кухняў.
Удзельнікам вечарыны былі прадэманстраваны відэаматэрыялы, з якіх можна было даведацца, што “Шматгалоссе” адзначана мноствам узнагарод. Гэты калектыў — дыпламант Першага абласнога фестывалю аматарскіх аб’яднанняў і клубаў па інтарэсах “Свет творчасці, свет захапленняў”, ІІ Усебеларускага фестывалю народнай творчасці “Беларусь — мая песня”, лаўрэат VI Усебеларускага фестывалю нацыянальных культур, за ўклад у развіццё дыялога і ўмацаванне згоды паміж народамі адзначаны дыпломам Нацыянальнай камісіі па справах ЮНЕСКО. У 2005 годзе “Шматгалоссе” атрымала ганаровае званне “народны аматарскі калектыў”.
Сярод тых, хто прыйшоў павіншаваць яго з 5-годдзем, былі старшыня Федэрацыі прафсаюзаў Беларусі і ўраджэнец Барысаўскага раёна Леанід Козік, старшыня райвыканкама Васіль Дылюк, начальнік упраўлення ўстаноў культуры і народнай творчасці Міністэрства культуры Васіль Чэрнік, дырэктар Рэспубліканскага цэнтра нацыянальных культур Ірына Лемцюгова, народны артыст Беларусі, прафесар Міхась Дрынеўскі, загадчык кафедры БДУ культуры і мастацтваў Пётр Гуд.
На вечарыне ў склад “Шматгалосся” прынялі новых членаў.
Аздобай імпрэзы стаў вялікі святочны канцэрт з удзелам ансамбляў “Шматгалоссе” і “Белыя зоры”, лепшых салістаў аматарскага аб’яднання нацыянальных культур. А завяршылася святкаванне танцавальна-забаўляльнай праграмай.
25 прадстаўнікоў “Шматгалосся” будуць прадстаўляць Барысаўшчыну і Мінскую вобласць на VII Усебеларускім фестывалі нацыянальных культур у Гродне.
Сцяпан БУКАЦІЧ
Барысаўскі раён
На здымку: выступае ўдзельнік аб’яднання
Кахабэр Цэракідзэ.