Псіхолагі сцвярджаюць, што феномен папулярнасці відэаблогінгу крыецца ў падсвядомасці. У адрозненне ад тэлезорак або акцёраў кіно, блогеры рэдка ўражваюць нейкай асаблівай харызмай. Хутчэй, спрацоўвае эфект пункту гледжання. Непрафесійнаму вандроўніку або назіральніку нейкіх падзей прасцей глядзець на свет вачыма такога ж, як ён, іначай, чым гэта робяць прафесійныя журналісты або кінадакументалісты.
Добрыя прыклады — расійскі вандроўнік Ілля Варламаў, які пашырыў межы свайго блогу з фотарэпартажаў да відэазамалёвак з розных краін. Або беларусы Раман Свечнікаў і Леанід Пашкоўскі, якія вядуць свае відэаблогі падчас вандровак па экзатычных краінах. У адрозненне ад Іллі Варламава, Раман Свечнікаў, які стаў вядомы пад брэндам «Рома едзе», не намагаецца рабіць са сваіх відэанататак мініяцюрнае СМІ. Яго блог уяўляе з сябе шэраг дакументальных замалёвак, аповед у якіх вядзецца ад першай асобы. Сёлета блогер прэзентаваў шасцісерыйную карціну «Вакол Беларусі на веласіпедах з маторамі», знятую сумесна з Барысам Нікалайчыкам. У ёй звычайны для відэаблогінгу стрымінгавы прынцып запісу прыкметна эвалюцыянуе ў бок дакументалістыкі ў жанры роўд-муві, а ў кожнага з эпізодаў пачынае праяўляцца асобны сюжэт. Але, што характэрна, канчаткова ў тэлеперадачу фільм Свечнікава не ператвараецца.
Паравоз са станцыі Ла-Сьёта
Відэаблогеры заканамерна прыйшлі да сваёй запатрабаванасці на хвалі папулярнасці сацыяльных сетак. То-бок развіццё інтэрнэт-тэхналогій выклікала і самы цікавы элемент іх дзейнасці — так званыя стрымы. Стрым (ад англ. stream — паток) — гэта жывая трансляцыя на адной з анлайн-платформаў. Стрымы сталі магчымыя пасля вынаходніцтва лічбавых камер з функцыяй бесперапыннага запісу. Іх прадвеснікамі былі вэб-камеры жывых трансляцый з вуліц розных гарадоў, якія масава з’явіліся напрыканцы дзевяностых. Па сутнасці, стрымы — гэта пэўны аналаг тэлевізійнай трансляцыі, за тым выключэннем, што жывыя тэлеэфіры вядуцца адразу з некалькіх камер, а іх сігнал апрацоўваецца ў апаратнай мантажу і падаецца гледачу ў выглядзе гатовай перадачы. Большасць стрымаў мае спецыялізаваны кірунак. Іх глядзяць вузкаспецылізаваныя або абмежаваныя аўдыторыі. Напрыклад, самымі папулярнымі стрымамі на гэты момант у YouTube з’яўляюцца трансляцыі чэмпіянатаў па кіберспорце, калі гледачы гадзінамі бачаць перад сабой ігравое поле. Як прыклад можна прывесці запісы вядомай у нашай краіне гульні, дзе імітуюцца танкавыя бітвы часоў Другой сусветнай вайны.
Папулярныя ў апошнія гады і стрымы, запісаныя з кабіны авіялайнера ці чыгуначнага лакаматыва. Яны могуць утрымліваць дзясяткі гадзін незмантаванага відэа поўнага рэйса самалёта або цягніка. У адрозненне ад запісаў, скажам, з практычнымі парадамі па рамонце бытавой тэхнікі або аглядамі навінак кіно, яны не маюць аніякага практычнага значэння. Гледача ў іх прыцягвае абсалютна новае, не зразумелае раней адчуванне і эмоцыі. Не падзеленая на адрэзкі, укладзеная ў стрым рэальнасць не ведае рукі мантажора і закадравага тэксту рэпарцёра. Вельмі складана назваць такі запіс дакументалістыкай, хоць фактычна ён з’яўляецца хронікай. Але і простым хоўм-відэа гэта ўжо не назавеш.
Нездарма летась з’явілася «Дарога» (Беларусь—Расія—Боснія, рэжысёр Дзмітрый Калашнікаў, прадзюсарка Вольга Чайкоўская), цалкам складзеная з запісаў аўтамабільных відэарэгістратараў. У рэжысёра атрымалася стварыць т.зв. мантаж атракцыёнаў, злучыўшы ў адну стужку кадры розных аварый і здарэнняў на расійскіх аўтатрасах.
Здаецца, стрымы месцяцца недзе паміж відовішчным атракцыёнам і сучасным мастацтвам. Як некалі месцілася вынаходніцтва братоў Люм'ераў. Ёсць меркаванне, што да 1915-га, года выхаду на экраны поўнаметражнай стужкі амерыканца Дэвіда Уорка Грыфіта «Нараджэнне нацыі», кіно было ў пачатковым стане, і толькі з моманту, калі Грыфіт увёў у кінематограф прынцыпы г.зв. «тоўстага рамана», узнік звыклы нам від мастацтва.
У падтрымку гэтай тэорыі нечакана выступіла мантажная стужка «Люм'еры!» французскага кіназнаўцы Цьеры Фрэмо, праграмнага дырэктара Канскага фестывалю. Яна была прэзентавана на Венецыянскім кінафоруме летась і ўяўляе з сябе добра адрэстаўраваныя 156 ролікаў, знятых братамі Агюстам і Луі Люм'ерамі і іх аператарамі паміж 1895 і 1900 гадамі. Практычна ўсе калісьці бачылі фрагменты з першых стужак у гісторыі чалавецтва — «Прыбыццё цягніка на станцыю Ла-Сьёта» і «Выхад рабочых з фабрыкі Люм'ераў». Цьеры Фрэмо злучыў самыя цікавыя з люм'ераўскіх кіназамалёвак у поўнаметражную карціну і паказаў іх цалкам упершыню за 100 год. Цікава, што большасць гэтых кадраў стогадовай даўніны і сучасныя стрымы вельмі падобныя па ступені ўздзеяння на гледача. Як першыя стужкі Люм'ераў або другой знакамітай французскай кампаніі «Патэ», так і відэазамалёўкі сучасных блогераў-стрымераў даюць магчымасць перазапусціць свае ўражанні і зноў атрымаць шчырыя эмоцыі.
Кінематограф 2.0 — усё ад самага пачатку
Феномен кіно, а за ім тэлебачання амаль цалкам заснаваны на эфекце прысутнасці, калі рэальнасць, адлюстраваная на экране, цалкам атаясамліваецца ў свядомасці гледача з рэальнасцю перад аб’ектывам камеры. Эфект гэты добра вядомы, звычайна мы кажам: «Стужка такая захапляльная, нават не заўважаем, што глядзім кіно». Але сучасны глядач ужо добра пераеў экраннага прадукту самага рознага гатунку, і дабіцца рэакцыі супадзення з кожным разам становіцца ўсё цяжэй. Магчыма, гэта звязана з неверагоднымі інфармацыйнымі патокамі і выкліканым імі эфектам кліпавай свядомасці. А магчыма, справа ў так званай інфляцыі эмоцый, якая несумненна назіраецца ў сучаснага гледача.
Зразумела, казаць аб смерці кіно не тое каб зарана — бессэнсоўна. Тым больш што кіно памірае ці не з пачатку трыццатых мінулага стагоддзя, калі ў яго прыйшоў гук і прыхільнікі Вялікага Нямога абвесцілі пра гібель сапраўднага кінамастацтва. Пурысты, упэўненыя ў тым, што кіно павінна быць толькі «нямым і чорна-белым», сустракаюцца і дасюль, нават праводзяць адмысловыя форумы і фестывалі, як у італьянскім Бергама, напрыклад.
Яшчэ адным абвеснікам скону кінематографа быў знакаміты брытанскі рэжысёр і сучасны мастак Пітэр Грынуэй. Дакладнай датай смерці кіно ў класічным выглядзе ён абвясціў 1982 год — вынаходніцтва пульта дыстанцыйнага кіравання тэлевізарам. І цяпер, упэўнены Грынуэй, кіно ўжо больш не тое мастацтва, што кіруе свядомасцю гледача. Наадварот, глядач кіруе фільмам, трансляцыю якога можна перарваць у любы момант. А з пераходам на лічбавы кантэнт глядач пазбавіўся неабходнасці абавязкова наведваць кінатэатр або краму з відэафільмамі і ўжо цалкам незалежны ад аўтараў стужкі.
Сапраўды, кінамастацтва ў ХХ стагоддзі амаль цалкам засноўвалася на рэжысёрскім бачанні. Аўтарскае кіно і цяпер лічыцца лепшым, што магло зрабіць чалавецтва з сінематографам Люм'ераў. Між тым глядач усё часцей адварочваецца ад аўтара. Гэта можна ўбачыць на прыкладзе серыялаў, шмат з якіх толькі сілкуецца штампамі, узятымі з аўтарскага кіно, насамрэч апошнім не з’яўляючыся. Яшчэ адну прычыну заняпаду кінамастацтва можна адшукаць у выраджэнні формы вялікага рамана. Калі сінематограф Люм’ераў убачыў свет, багата хто з яго гледачоў увогуле не ўмеў чытаць. Паступова глядач станавіўся і чытачом, аднак апошнія чатыры дзесяцігоддзі кінематограф ізноў змяніў вектар развіцця з асветніцкага на забаўляльны. Здаецца, цікавасць да стрымаў і відэаблогаў, пазбаўленых аўтарскага бачання, але напоўненых натуральнымі эмоцыямі, дае другое жыццё знакамітаму вынаходніцтву больш чым стогадовай даўніны.
Калі сочыш за сучаснымі стрымамі, то разумееш: пытання з новымі Люм’ерамі больш няма, справа за новымі Грыфітамі. Адкуль яны прыйдуць, пакуль невядома, але тое, што яны абавязкова неўзабаве з’явяцца, — ніякіх сумненняў.