2019 год багаты на важныя гістарычныя даты — 100-годдзе заснавання БССР, 80-годдзе ўз’яднання Беларусі, 75-годдзе з дня вызвалення ад нямецка-фашысцкіх захопнікаў… А яшчэ сёлета спаўняецца 95 гадоў беларускаму кіно, якое ў той ці іншы спосаб адлюстравала і гэтыя, і многія іншыя падзеі нашай мінуўшчыны. А таксама — сучасную эпоху. Гэты юбілей стаў для нас нагодай прысвяціць айчыннаму кінематографу асобны праект, які выявіўся плёнам супрацоўніцтва з Музеем гісторыі беларускага кіно, а таксама кінакрытыкамі і кінажурналістамі новай генерацыі.