Аснова калекцыі і прасторы горада
На момант, калі пішуцца гэтыя радкі, у Маладзечне адбываюцца два пленэры — “Маладзечна АРТ — 2016” і “Вернісаж камянёў”. У адным бяруць удзел жывапісцы, у другім — скульптары. Першы блізкі да завяршэння, другі толькі распачаўся. У дзень адкрыцця пленэру жывапісцаў адбылася прэзентацыя каталога “Мастакі Маладзечанскага краю”. Да выдання cпрычыніліся Нацыянальны мастацкі музей Рэспублікі Беларусь, Мінскі абласны краязнаўчы музей, Беларускі саюз мастакоў, Палац культуры горада Маладзечна. Патрэба ў такім выданні, у сістэматызацыі мастацкіх набыткаў творцаў, народжаных ці ўзгадаваных маладзечанскай зямлёй, наспела даўно. Насамрэч, варта асэнсаваць феномен Маладзечна ў кантэксце беларускай культуры, і згаданае выданне якраз і з’яўляецца крокам у гэтым кірунку.