Прэзідэнт Рэспублікі Беларусь Аляксандр Лукашэнка накіраваў спачуванні родным і блізкім вядомага кінарэжысёра, народнага артыста Беларусі Ігара Дабралюбава ў сувязі з яго смерцю. Пра гэта паведаміла Прэс-служба Кіраўніка дзяржавы. Ігар Дабралюбаў пакінуў адметны след у гісторыі айчыннай культуры. Знятыя ім цудоўныя фільмы для дарослых і дзяцей сталі сапраўднай класікай нацыянальнага мастацтва, яны карыстаюцца нязменным поспехам у гледачоў розных пакаленняў. Жыццё і творчасць Ігара Міхайлавіча — прыклад высокага прафесіяналізму і самаадданага служэння сваёй справе для ўсіх кінематаграфістаў краіны, адзначыў Аляксандр Лукашэнка. “Светлая памяць пра знакамітага Майстра беларускага кіно Ігара Міхайлавіча Дабралюбава будзе заўсёды з удзячнасцю захоўвацца на нашай зямлі”, — гаворыцца, у прыватнасці, у спачуванні.