Быкаўскія Козел-Паклеўскія
Калі вы наведаеце вёску Быкаўшчына, што ў Полацкім раёне, будзеце забяспечаны гасцінным прыёмам. Спачатку алея старых ліп прыветна раскіне галіны, каб парадаваць вока гараджаніна (хаця многія дрэвы, на жаль, не дажылі да цяперашняга часу — вясковая ўлада чамусьці вырашыла, што “старыя” камусьці перашкаджаюць). Садзіў іх яшчэ ў ХІХ стагоддзі тутэйшы пан. Менавіта тут знаходзіўся родавы маёнтак Козел-Паклеўскіх. Сказаць, калі яны ўпершыню аблюбавалі гэтыя мясціны і прыехалі сюды жыць, дакладна зараз не можа ніхто, але па архіўных звестках вядома, што з 1844 года маёнтак ужо знаходзіўся ў валоданні Ганны Козел-Паклеўскай. Дарэчы, раней гэты маёнтак называўся (на польскі лад) Быкаўшчызна і ў склад яго ўваходзілі бліжэйшыя вёскі Глінскія, Чачэлава, Старухі і Лугавыя. Знаходзіўся ён за 130 вёрст ад губернскага Віцебска, за 55 — ад павятовага Лепеля і за 25 – ад Полацка.
Далей