“Пакаленне “джынс” — у прасторы традыцыі
Чарговы навукова-практычны семінар у БелДІПК быў прысвечаны працы з нацыянальным касцюмам. Яго сённяшняе рэальнае існаванне ілюстравала цудоўная фотавыстаўка вядучага навуковага супрацоўніка Інстытута праблем культуры, кандыдата мастацтвазнаўства Вольгі Лабачэўскай, яна ж — і вядучая семінара. На фотаздымках можна было не проста ўбачыць, нават адчуць асаблівую арганічнасць нацыянальных строяў у прыродным асяродку і тое, наколькі ўпрыгожваюць яны і людзей сталага веку — носьбітаў традыцыі, — і сучасную моладзь. “Энергетыку традыцыйнага касцюма, — сказала мне Вольга Аляксандраўна, — адчувае кожны, каму давялося апрануць на сябе льняную сарочку, фартух, шарсцяны андарак з бабулінага куфра. Колькі разоў бачыла, як мяняюцца твары і постаць гарадскіх дзяўчат, калі ім раптам даводзіцца ўвайсці ў прастору старадаўняга строю. Але і па гэтых фотаздымках вы бачыце, што “пакаленне “джынс” і карыстальнікаў інфармацыйных тэхналогій зусім натуральна паводзіць сябе ў старадаўніх строях канца ХІХ — пачатку ХХ стагоддзя”.
Далей