Не дзіва, што прэмій ды ўзнагарод у калектыву і ў яго спектакляў — безліч. Чаго варты хаця б цэлы “букет” узнагарод Другой Нацыянальнай тэатральнай прэміі Беларусі за “Пікавую даму” (дадамо, што летась гэтая пастаноўка атрымала чарговае прызнанне — Гран-пры Міжнароднага тэатральнага фестывалю “Vasara-2013”)! Нават спецыяльнай прэміяй Прэзідэнта Рэспублікі Беларусь дзеячам культуры і мастацтва тэатр ужо быў аднойчы адзначаны — у 2003 годзе. А сёлета, атрымаўшы гэтую высокую ўзнагароду зноў, развянчаў міф пра тое, што ў адну ваду не ўваходзяць двойчы.
— Узнагароды атрымліваць заўсёды прыемна, — усміхаецца Алег ЖУГЖДА. — Для мяне гэта пацвярджэнне рэнамэ нашага тэатра, заваёва чарговых творчых пазіцый, доказ таго, што тэатр трымае высокую планку.
— Планаў, ведаю, у вас шмат. У снежні выйшла ваша прэм’ера — “Фаўст. Сны” паводле Гётэ. Пэўна, для гэтага спектакля ўжо намечаны гастролі?
— Першымі яго ўбачаць мінчане і госці сталіцы на чарговым Міжнародным фестывалі тэатраў лялек. Але літаральна напярэдадні ён будзе паказаны на Другім Міжнародным фестывалі “Лялькі над Нёманам” у Гродне. На восень плануецца выезд з ім у Екацярынбург, засталося вырашыць транспартныя праблемы. У Арол і Іванава паедзе “Пікавая дама”, у Арэнбург — “Макбет”. Улетку мы запрошаны на некалькі фестываляў у Польшчу.
— Цікава, што такі шчыльны гастрольны графік (вас у Гродне бывае ўвогуле цяжка заспець) не перашкаджае плённай творчай працы: вы проста фантануеце прэм’ерамі і новымі праектамі!..
— Не ведаю, як наконт “фантанаў” або іншых водных “стыхій”, але зараз працуем над “Прыгодамі Бібігона” паводле Карнея Чукоўскага. Спектакль — для дзяцей, але заняты ў ім сапраўдныя мэтры. У галоўнай ролі, да прыкладу, — наш вядомы бард Віктар Шалкевіч. Будзем імкнуцца выпусціць пастаноўку акурат да вясновых канікул. Як звычайна, насычаным будзе “тэатральны тыдзень”, што ладзіцца ад Міжнароднага дня тэатра лялек — 21 сакавіка — да Дня тэатра — 27-га. Рыхтуем таксама праект “Крутится-вертится шар голубой” — гэта своеасаблівая анталогія гарадскога раманса з лялькамі і без. Да канца года, спадзяёмся, выпусцім “Дэмана” паводле Лермантава...
— Форум “Лялькі над Нёманам” — ваша ідэя. Фестываль атрымаў вялікі розгалас. Якія ж будуць асаблівасці сёлетняга?
— Заявак на ўдзел даслана больш за дваццаць. Вядома, ад чагосьці давядзецца адмовіцца, бо зараз мы заняты тым, як змясціць усё магчымае і немагчымае ў чатыры з паловай дні...
На здымках: сцэны са спектакляў гродзенскіх лялечнікаў.