Як ён паведаміў «К», праект так і называецца: «Камп’ютарызацыя рэгіянальных музеяў Беларусі». Яго валанцёры знайшлі спачатку аднадумцаў у адной з буйных IT-кампаній. Яна апрацоўвае вялікія аб’ёмы інфармацыі, карыстаецца самай сучаснай тэхнікай, таму пастаянна яе абнаўляе. “Бэушныя” камп’ютары (не самыя, як вы разумееце, горшыя) і вырашылі бязвыплатна перадаць у музейныя ўстановы.
Ці цяжка было знайсці спонсараў-мецэнатаў? Па словах кіраўніка праекта, спатрэбілася ўсяго толькі трапіць у пэўнае месца ў канкрэтны час. Трапілі! І ў гэтым — сіла добраахвотнага валанцёрскага руху. Спонсары, адчуўшы энтузіязм і сацыяльную моц талакі, таксама становяцца валанцёрамі.
Чаму менавіта музеі, а не сельскія бібліятэкі ці клубы, частка якіх таксама пакутуе сёння з-за недахопу камп’ютарнай тэхнікі? Арцемій Панькоў тлумачыць, што музейная тэма цяпер вельмі яму блізкая, бо адна з чарговых ідэй звязана са стварэннем нефармальнага музея электроннай музыкі. Але новыя ідэі нараджаюцца ці не штодня. Таму не выключана магчымасць таго, што пад валанцёрскую апеку патрапяць у свой час бібліятэчныя і клубныя ўстановы нашых рэгіёнаў.
А музеі абіраліся таксама талакой. Хтосьці з валанцёраў праекта наведаў калісьці ўстановы і на ўласныя вочы пераканаўся ў іхняй, мякка кажучы, не надта грунтоўнай матэрыяльнай забяспечанасці.
Ліст з падзякай у Мінск накіравала дырэктар Карэліцкага краязнаўчага музея Святлана Моніч.
— Я нядаўна на пасадзе, — узрушана кажа яна, — і вось ужо працую на новай тэхніцы. У выніку рэалізацыі праекта мы атрымалі і два камп’ютары, і прынтары да іх, якія сёння будуць падключаны. Вось такая нечаканая, але прыемная спонсарская дапамога!..
Гэткімі ж станоўчымі эмоцыямі перапоўнены і кіраўнік Вілейскага краязнаўчага музея Сяргей Ганчар, які сваю «дабрачынную» тэхніку гэтымі днямі толькі забірае. Камп’ютары ад сацыяльнай талакі, як паведаміў кіраўнік праекта Арцемій Панькоў, трапілі яшчэ ў Клуб-музей Чэслава Немэна ў Старых Васілішках, што на Шчучыншчыне, і ў Любчанскі замак…
Дык хто яшчэ купіў новы камп’ютар? Не забывайцеся, што ў рэгіёнах установы культуры і старым рады...