Сёння матэрыялы прадастаўлены Нацыянальным гістарычным архівам Рэспублікі Беларусь. Дзякуючы старонцы ў сацыяльнай сетцы ўсё больш людзей можа пабачыць унікальныя дакументы, дакрануцца да мінуўшчыны. Дарэчы, сама ўстанова акурат сёлета адзначае 75-годдзе з часу заснавання! Віншуем і жадаем цікавых знаходак! Пакуль жа — частка цікавых дакументаў, што прадаставіў архіў для публікацыі на старонках газеты "Культура".
1. Гродзенскі земскі суд. Канцылярскі служка занудзіўся перапісваць аднастайныя тэксты і вырашыў намаляваць у актавай кнізе караля Жыгімонта ІІ Аўгуста і кіеўскага праваслаўнага мітрапаліта. “Facebook” XVI стагоддзя. 1556 г.
2. Патэнт, выдадзены магістратам аўстрыйскага горада Грос-Каморн (сучасны Камарна ў Славакіі) кавальскіх спраў майстру Андэрсу Шперлінгу, які напрыканцы XVIII ст. прыехаў у Віцебск. 1781 г.
3. Касцельны служка зарысаваў на старонках кнігі абрад хрышчэння. Такой была пінская шляхта 250 гадоў таму. Пінск, сярэдзіна XVIII ст.
4. Дарчы ліст Дашкі Яцкавіча Храбтовіча царкве Прасвятой Багародзіцы Лаўрышаўскага манастыра на двух падданых у Шчорсах. Скорапіс на пергаміне. 1488 г.
5. Уласнаручны подпіс Льва Сапегі. Год — пасля сыходу з пасады вялікага канцлера, год — да заступлення на пасаду вялікага гетмана. 1624 г.
