Тое, што агульнабеларускія тэндэнцыі інавацыйнасці ды аптымізацыі закранулі і гэтае свята, даўно не навіна. Экстэнсіўны шлях развіцця, накіраваны на максімальнае пашырэнне колькасці ўдзельнікаў ды мерапрыемстваў, саступіў месца кірунку на інтэнсіфікацыю. Скарачэнне тэрмінаў, фестывальных пляцовак і саміх мерапрыемстваў зробіць свята больш кампактным, дынамічным, адпаведным цяперашнім рэаліям, калі час становіцца ўсё больш “згушчаным”, спрэсаваным, канцэнтраваным.
На гэтым эскізе бачна, як відазменіцца сёлета афармленне сцэны Летняга амфітэатра.
Фестываль “амалодзіцца”: сярод удзельнікаў (і, адпаведна, сярод гледачоў) будзе больш моладзі. Клапоцяцца арганізатары і пра тое, каб больш было таксама тэлегледачоў, таму асобая ўвага надаецца відовішчнасці, сучаснаму абсталяванню сцэны Летняга амфітэатра.
У цэнтры абмеркаванняў было і пытанне самаакупнасці. Сваімі грашыма, у тым ліку і ад прададзеных білетаў, фестываль пакрывае ўжо амаль тры чвэрці ўсіх выдаткаў. Плануецца, што поўнай самаакупнасці ён дасягне праз тры-чатыры гады. Што ж да мастацкага напаўнення, дык сёлета свой унёсак у яго зробяць прадстаўнікі 31 краіны, сярод якіх — Аўстралія, Венесуэла, Вялікабрытанія, Германія, Данія, Ізраіль, Італія, Куба, Фінляндыя, Францыя ды многія іншыя.
Журы “дарослага” конкурсу ўзначаліць знакамітая Ларыса Доліна. Ад Беларусі ў яго склад увойдзе народны артыст краіны, вядомы далёка за яе межамі, — Анатоль Ярмоленка. Адбыліся некаторыя змены ў складзе журы дзіцячага конкурсу: яго старшынёй стане не Ядвіга Паплаўская, а Аляксандр Ціхановіч.