— Што ўяўляе з сябе "Прымацкая бяседа" і ў чым адметнасць сёлетняга фестывалю?
— Гісторыя фэсту налічвае трынаццаць гадоў. Першапачаткова ён называўся "Сяброўская бяседа" і праводзіўся ў Гарадку. Пасля пераезду ў Міхалова праект атрымаў новую назву — "Прымацкая бяседа". Хочаца сказаць, што з самага пачатку заснавання фестывалю мы плённа супрацоўнічаем з Міністэрствам культуры Беларусі, адчуваем яго вялікую падтрымку. І, як запэўніў Барыс Святлоў, сёлета таксама чакаецца істотная дапамога з беларускага боку. Так, прыезд калектываў на форум будзе фінансавацца беларускімі партнёрамі. Калі ж казаць пра наш фестываль, то ён хоць і не цалкам прысвечаны фальклору, але адлюстроўвае даўнія беларускія традыцыі. "Прымацкая бяседа" заўсёды распачынаецца ў першую суботу жніўня ў мястэчку Міхалова, што амаль на мяжы Польшчы з Беларуссю.
— Хто ўдзельнічае ў фэсце?
— На 99% на фестывалі прадстаўляецца беларуская культура. Ужо маем дамоўленасць з вядомымі калектывамі і выканаўцамі адносна ўдзелу ў сёлетняй "Прымацкай бяседзе". Так, летась у нас выступалі "Купалінка" і "Песняры". Сёлета на фестываль запрошаны "Бяседа", "Неруш", "Беларусы", Алена Ланская і Аляксей Хлястоў, а таксама некаторыя іншыя не менш вядомыя выканаўцы, з якімі цяпер абмяркоўваюцца ўсе ўмовы выступлення.
— Наколькі запатрабаваны фестываль па-за межамі Міхалова?
— Форум з’яўляецца міжнародным. Традыцыйна да нас прыязджаюць аматары музыкі з усёй Польшчы, а таксама госці з Францыі, Англіі і іншых еўрапейскіх краін. Нам важна паказаць, што беларуская супольнасць у Польшчы мае свае адметныя рэгіянальныя традыцыі, а разам з тым захоўвае і шануе нацыянальны каларыт, родную культуру.
— Пад час правядзення буйных айчынных фестываляў часта ўзнікае праблема з пражываннем турыстаў. Наколькі актуальна гэтае пытанне для "Прымацкай бяседы"?
— У нас турыстаў з гасціннасцю прымаюць не толькі шматлікія гатэлі, турбазы ў Міхалове і яго ваколіцах, але і мясцовыя жыхары. Зняць пакой на час фестывалю не з’яўляецца праблемай. Мы прытрымліваемся наступнай думкі: важна, каб турыст не толькі пабываў на музычных выступленнях, але і змог пагуляць па нашым мястэчку, пабачыць яго адметнасці. Усю неабходную інфармацыю пра фестываль і пражыванне ў Міхалове можна знайсці на старонцы нашай гміны ў Інтэрнэце. Дарэчы, на форум збіраецца больш за 7 тысяч чалавек. Пры гэтым захоўваецца ўтульная атмасфера.
"Прымакі" пад час канцэрта ў Белдзяржфілармоніі.
— "Прымакі" — гэта фальклорны калектыў?
— Не зусім. Наш калектыў лічыцца эстрадным. Тым не менш, мы імкнёмся працаваць у рэчышчы традыцыйнай беларускай культуры. Па нашых сцэнічных касцюмах, дарэчы, зробленых у Беларусі, можна пазнаць, да якой культуры мы належым. Фінансавую падтрымку нам аказвае і мясцовая гміна, з якой заключана афіцыйнай дамова.
— Наколькі рэальна зрабіць бязвізавы ўезд для гасцей фестывалю з Беларусі?
— Пытанне з бясплатнымі візамі для беларусаў разглядаецца. А цяпер рэалізуецца цікавы праект, паводле якога кожны ахвотны можа набыць білет у Падляскую оперу і філармонію ды атрымаць бясплатную візу. Ведаю, што такім чынам Беластоцкі тэатр наведалі некалькі тысяч беларусаў. Спадзяюся, што нешта падобнае атрымаецца рэалізаваць і для наведвальнікаў "Прымацкай бяседы".
Фота Кастуся АНТАНОВІЧА, Юрыя ІВАНОВА