Напярэдадні ўрачыстасцей прайшла прэс-канферэнцыя, якая падсумавала зробленае ў справе ўшанавання памяці і папулярызацыі творчай спадчыны Якуба Коласа. Як адзначыў намеснік міністра культуры краіны Тадэуш Стружэцкі, сёлета назіраўся шырокі ўдзел грамадскасці ў святкаванні юбілеяйных угодкаў нашых Песняроў. Адбываліся і праводзяцца сёння арт-праекты з гэтай нагоды, у тым ліку далёка за межамі нашай краіны.
Дырэктар Дзяржаўнага літаратурна-мемарыяльнага музея Якуба Коласа Зінаіда Камароўская паведаміла, што да юбілейнай даты вялася актыўная выставачная работа, у тым ліку з замежнымі партнёрамі. Так, выстаўкі, прысвечаныя Якубу Коласу, з поспехам ужо прайшлі ў Расіі, ва Украіне, у Арменіі, Балгарыі, Польшчы, Літве і Латвіі…
Па словах Тадэуша Стружэцкага, асноўныя мерапрыемствы ініцыявалі Міністэрства культуры і літаратурныя музеі. Сярод новых, адметных, акцый намеснік міністра адзначыў праекты “Чытаем Коласа разам”, “130 прысвячэнняў Песняру”, да якіх далучылася шмат дзеячаў культуры, моладзь.
Разам з тым, намесніка міністра хвалюе і пытанне далейшай запатрабаванасці ў турыстаў філіяла Дзяржаўнага літаратурна-мемарыяльнага музея Якуба Коласа “Мікалаеўшчына”. З гэтай нагоды плануецца актывізаваць працу з найбуйнейшымі тураператарамі краіны. Мяркуецца, што аб’екты “Мікалаеўшчыны” ўвойдуць у комплексныя маршруты, скіраваныя на Мір і Нясвіж.
Тым часам шэраг мерапрыемстваў з нагоды юбілейных угодкаў Якуба Коласа пройдзе ў беларускай сталіцы напярэдадні дня нараджэння класіка. У прыватнасці, 30 кастрычніка ў Музеі сучаснага выяўленчага мастацтва адбудзецца адкрыццё выстаўкі работ народнага мастака Беларусі Васіля Шаранговіча, дзе прадставяць звыш ста яго твораў. Гэтым жа днём у музеі класіка чакаецца прэзентацыя 17-га і 18-га тамоў з поўнага Збору твораў Якуба Коласа.
Акрамя таго, у філіяле Беларускага дзяржаўнага музея гісторыі тэатральнай і музычнай культуры “Гасцёўня Уладзіслава Галубка” адкрыецца выстаўка “Паэма Якуба Коласа “Новая зямля” на сцэне”.
К.А.