Адной з акцый, якая пройдзе з 30 чэрвеня па 2 ліпеня, стане арт-фэст "Тэатр Уршулі Радзівіл". У ім прымуць удзел вядучыя тэатральныя калектывы краіны: Нацыянальны акадэмічны тэатр імя Янкі Купалы з пастаноўкай "Выкраданне Еўропы, або Тэатр Уршулі Радзівіл" Мікалая Пінігіна, Нацыянальны акадэмічны тэатр імя Якуба Коласа з "Ладдзёй Роспачы" Міхася Краснабаева, Нацыянальны акадэмічны тэатр імя Максіма Горкага з "Пане Каханку" ў рэжысуры Сяргея Кавальчыка і Рэспубліканскі тэатр беларускай драматургіі са спектаклем "Каласы пад сярпом тваім" у пастаноўцы Валерыя Анісенкі.
Усе пастаноўкі будуць звязаны тэмай гісторыі роду Радзівілаў і ўвогуле беларускай мінуўшчыны.
Спектаклі мяркуюць паказваць як у замкавым двары Нясвіжскага палацава-паркавага комплексу, так і ў гасцявых пакоях, прычым, да прыкладу, 30 чэрвеня запланаваны як дзённая, так і вячэрняя пастаноўкі.
Але ж зразумела, што дадзены фэст - гэта толькі кропля ў моры музычных і тэатральных падзей, якія чакаюць жыхароў і наведвальнікаў Нясвіжа ў гэтым годзе. Тэатральнае і музычнае мастацтва ў старажытным асяроддзі будуць прадстаўляць і Нацыянальны акадэмічны Вялікі тэатр оперы і балета Рэспублікі Беларусь, і замежныя госці.