Завічкай на Ганцаўшчыне называюць жонку брата ці сваячку. Адсюль - і назва народнага аўтэнтычнага фальклорнага гурта - "Завіца": усе ў ансамблі - сваякі і родзічы.
Дзейнічае ён пры СДК вёскі Раздзялавічы. Ініцыятар стварэння "Завіцы"- Соф'я Мікалаеўна Рабцэвіч, знаўца мясцовых песень, прымавак, прыказак і абрадаў. Уся гэтая ўнікальная спадчына і стала рэпертуарам самадзейных артыстак, што добра вядомыя ўжо на Палессі.
Хата ў Соф'і Мікалаеўны - нібы этнаграфічны музей: самаробныя ручнікі, посцілкі, дыванкі - паўсюль. А якія вышываныя навалачкі на падушках! А якія непаўторна духмяныя караваі! Гэткія ж непаўторныя і песні ў "Завіцы": слухаць - не наслухацца!..
Дарэчы, усе песні гурта зафіксаваны ў фондах аўдыяі відэазапісаў райметадцэнтра аддзела культуры Ганцавіцкага райвыканкама.
Фота аўтара
На здымку: раздзялавіцкая "Завіца" (на першым плане - Соф'я Рабцэвіч).