Цырымонія перадачы адбылася пад час Міжнароднага музычнага фестывалю "Залаты шлягер-2011" у Магілёўскім абласным мастацкім музеі імя П.Масленікава. Ідэя акцыі належыць Віктару Альшэўскаму, вядомаму жывапісцу, ураджэнцу Магілёўшчыны. Сутнасць сумеснага праекта Міністэрства культуры Рэспублікі Беларусь і Творчых майстэрняў у тым, што творы мастацтва, назапашаныя за апошнія гады ў майстэрнях, перабяруцца ў раёны рэспублікі.
Па словах міністра культуры краіны Паўла Латушкі, які прыняў удзел у цырымоніі, вельмі важна, што гэтыя работы не застаюцца ў запасніках. Праект, зазначыў міністр, варты працягу, бо высокае мастацтва заўжды бярэ пачатак з рэгіёнаў. Як удакладніў для "К" Віктар Альшэўскі, перададзеныя творы папоўняць менавіта пастаянныя экспазіцыі. Інакш кажучы, вынік мастакоўскіх захадаў стане, урэшце, запатрабаваны.