На выстаўцы прадстаўлена каля 70 фотаздымкаў 1945 - 1956 гадоў з выявамі пасляваеннага Мінска і тых гарадоў, куды Міхалап ездзіў у экспедыцыі па заданні Саюза архітэктараў.
Як адзначае праўнучка мастака, кандыдат гістарычных навук Настасся Скеп'ян, зварот да такога жанру мастацтва быў для творцы невыпадковы. Яшчэ да Вялікай Айчыннай вайны ў сям'і Міхалапаў захапляліся фотаздымкамі, але з даваенных фота, што рабіліся на шкляных пласцінах, захаваліся толькі здымкі сямейнага жыцця і выявы некалькіх твораў выяўленчага мастацтва.
Пасля вяртання ў вызвалены Мінск у 1944-м Мікалай Міхалап імкнуўся зафіксаваць відарысы напаўразбуранага горада, а таксама непасрэдна сам працэс аднаўлення беларускай сталіцы з руін.
Вялікую цікавасць выклікаюць не толькі панарамныя фота Мінска, але і каштоўныя здымкі элементаў гарадской забудовы ды архітэктурныя дэталі- балконы, фрагменты асобных дамоў.
Дапаўняюць экспазіцыю керамічныя творы Мікалая Міхалапа, створаныя як на пачатку ХХ ст., так і ў пасляваенны перыяд, якія адлюстроўваюць шматгранны талент мастака.
На здымках Мікалая Міхалапа 1945 г.: зняцце грунту на вуліцах Мінска; каля Кафедральнага сабора.