У наступным нумары "К" чытачоў чакае вялікі матэрыял з нагоды пастаноўкі. Аднак нам, натуральна, карцела зазірнуць за кулісы тэатральнай "кухні" і злавіць апошнія моманты перад тым, як спектакль убачыць святло сцэны. І- разам з вамі стаць, па сутнасці, першымі гледачамі н
овай пастаноўкі.
Тым больш, што, як распавёў нам загадчык літаратурнадраматычнай часткі Купалаўскага тэатра Ігар Скрыпка, галоўнай адметнасцю новага спектакля з'яўляецца тое, што "Тэатр Уршулі Радзівіл" - першая на Беларусі спроба звароту да вытокаў традыцыйнага тэатра, якія зыходзяць акурат з творчай дзейнасці гэтай знакамітай прадстаўніцы старадаўняга роду. Яна ў сваім Нясвіжскім палацы ладзіла шляхецкія тэатральныя забавы, куды з'язджаліся прадстаўнікі тагачаснага вышэйшага свету. Таму новы спектакль будзе, па сутнасці, спробай рэканструкцыі тых дзействаў, з якіх і пачыналася станаўленне прафесійнага тэатра на нашых землях.
Зрэшты, нельга пахваліцца, што сёння мы можам дэталёва ўзнавіць і "рэканструяваць" тыя вечары, якія ладзіліся ў Нясвіжы Францішкай Уршуляй Радзівіл. Таму многае ў новай пастаноўцы купалаўцаў- плён творчага асэнсавання тагачасных культурных традыцый з улікам сённяшняга погляду. І думаецца, што не ў апошнюю чаргу спектакль зацікавіць менавіта гэтым.
Фота Юрыя ІВАНОВА
На здымках: сцэна са спектакля; у ролі Еўропы - Юлія Шпілеўская.