Як паведаміў у гутарцы з карэспандэнтам "К" галоўны архітэктар праекта Сяргей Багласаў, ужо ўзгоднены ўсе дэталі ўзвядзення комплексу з Міністэрствам культуры, а таксама Камітэтам архітэктуры і горадабудаўніцтва Мінгарвыканкама. Плануецца, што будаўнічыя работы распачнуцца да 2014 г.
Сёння ж на парадку дня ў стваральнікаў "Мінскага замчышча", па словах Сяргея Багласава, - распрацоўка тэматычных планаў будучых экспазіцый, а таксама непасрэдны пошук саміх музейных прадметаў. Да таго ж, сёлета прадоўжацца і археалагічныя раскопкі ў цэнтры беларускай сталіцы, якія, як спадзяюцца айчынныя навукоўцы, змогуць праліць святло на таямніцы гісторыі старажытнага Мінска.
Як ужо паведамляла "К", на месцы будынка "Працоўныя рэзервы" запланавана стварыць - у натуральную велічыню - макет фрагмента горада XII стагоддзя, з уязной брамай, абарончымі валамі, храмам і нават тагачаснымі вуліцамі.