- Канцэрт у сталічнай філармоніі,- распавёў аўтар праекта, дырыжор Вячаслаў Бартноўскі,- стане заключным у суцэльным цыкле такіх канцэртаў, што цягам паўгода прайшлі ва ўсіх абласных цэнтрах, а таксама ў Маладзечне. Пры гэтым, як вы разумееце, мы намагаліся паказаць навучальныя музычныя ўстановы ўсёй краіны. Шырока былі задзейнічаны мясцовыя сімфанічныя аркестры, якія акампанавалі юным талентам. У іншыя гарады выязджаў Дзяржаўны камерны аркестр Беларусі. На цяперашнім заключным гала-канцэрце гэтая традыцыя выступленняў з аркестрам прадоўжыцца: салісты будуць граць з Дзяржаўным акадэмічным сімфанічным аркестрам Беларусі. Выступіць і навучэнец Рэспубліканскага каледжа пры Беларускай дзяржаўнай акадэміі музыкі Павел Нетук, які стаў дыпламантам Міжнароднага конкурсу піяністаў "Мінск2010". Будуць удзельнічаць прадстаўнікі ўсіх рэгіёнаў, прычым некаторыя - разам са сваімі калектывамі. Канцэрт гэты, дарэчы, бясплатны для публікі, так што фанаў у юных зорак стане яшчэ больш.
На другім канцэрце - "Таленты Беларусі" - салістам будзе акампанаваць сімфанічны аркестр тэатра (дырыжор - Вячаслаў Воліч), выступяць таксама некалькі цудоўных калектываў юных музыкантаў: Капэла хлопчыкаў Уладзіміра Глушакова, Канцэртны аркестр Уладзіміра Перліна, ансамбль цымбалістаў "Залатая струна" Ганны Полесавай, ансамбль трубачоў "Інтрада" Мікалая Волкава. Убачым мы, зразумела, і тых лаўрэатаў фонду Прэзідэнта, якія сталі зорнымі салістамі тэатра: Аксану Волкаву, Таццяну Гаўрылаву, Іллю Сільчукова, салістку балета Марыну Парамонаву. Сыграе і Улада Беражная - на скрыпцы А.Гварнеры.