Першай настаўніцай Фяськовай стала Клаўдзія Абакумава, якая навучыла нарыхтоўваць і апрацоўваць лазу. Навука плесці нават самыя простыя кошыкі была нялёгкай, але Таццяна яе засвоіла хутка. Потым пачала ствараць больш складаныя рэчы. З цягам часу яе вырабы пачалі купляць. На выстаўцы дэкаратыўна-прыкладнога мастацтва, што адбылася пад час свята гарадоў Магілёва, работы майстрыхі карысталіся надзвычайным попытам.
Паступова ў Таццяны Міхайлаўны з'явіліся вучні, якім яна стала перадаваць майстэрства лозапляцення. Цяпер жанчына ўпэўнена развівае традыцыі рамяства, стварае аўтарскія рэчы для афармлення інтэр'ераў. Прымала ўдзел у I Рэспубліканскім свяце-конкурсе лозапляцення "Лазовыя карункі" (1998 г.), дзе атрымала дыплом III ступені.
Да свайго захаплення лазой Таццяна Міхайлаўна прыахвоціла і сына з нявесткай. За творчы пошук, за развіццё традыцыйнага мастацтва яна ў 1999-м была прынята ў Беларускі саюз майстроў народнай творчасці.
Алена ЦІШКЕВІЧ, вядучы метадыст Магілёўскага абласнога метадычнага цэнтра народнай творчасці і культурнаасветніцкай работы
На здымку: Таццяна Фяськова за працай.