Па словах загадчыка галерэйна-выставачнай дзейнасці НББ Фёдара Ястраба, Тыдзень культуры тады выдаўся надзвычай маштабным. Беларусы ўразілі культурную эліту Абу-Дабі сваёй творчасцю. Выстаўку жывапісу дванаццаці айчынных мастакоў за пару гадзін паглядзелі некалькі соцень чалавек. А сам Тыдзень культуры стаў у Эміратах адным з самых запамінальных - як па колькасці артыстаў (прыкладна 200 творцаў), так і па паспяховасці іх выступленняў.
Гэта дало падставу арганізаваць выстаўку і для нашых гледачоў: яна будзе працаваць у галерэі "Панарама" да 15 студзеня 2011 года. Дванаццаць майстроў паказваюць своеасаблівую беларускую школу жывапісу, выяўляючы міфалогію, краявіды, формы абстрактнага мыслення, адрозныя ад іншых вобразы і каларыт. Уладзімір Кожух, Ягор Батальёнак, Уладзімір Савіч, Васіль Касцючэнка, Аляксандр Грышкевіч, Фёдар Ястраб ды іншыя мастакі сярэдняга пакалення прадстаўлены ў экспазіцыі. Яны дэманструюць разнастайнасць творчых тэхнік і стыляў айчыннага жывапісу.
Выстаўка арганізавана пры падтрымцы Міністэрства культуры Рэспублікі Беларусь, Нацыянальнай бібліятэкі Беларусі і Міжнароднай гільдыі жывапісцаў.