Сем нот тэатральнага акорда
На адкрыцці форуму сваё майстэрства прадэманстравалі гаспадары свята - народны тэатр Бярэзінскага дома культуры пад кіраўніцтвам рэжысёра Мікалая Пытляка.
Пастаноўка "Валянцін і Валянціна" распавяла сучаснай сцэнічнай мовай гісторыю першага кахання. Зала была перапоўнена. Па словах Мікалая Пытляка праблем з недахопам акцёраў ніколі не было, бо жыхары горада хочуць паспрабаваць сябе ў нейкай ролі, і не заўжды ў другаснай, а - у галоўнай.
Сёлетняя "Бярэзінская рампа" прапанавала сем спектакляў. У конкурсе прымалі ўдзел тэатры з Беразіна, Жодзіна, Слуцка, Салігорска, Барысава, Нясвіжа, а таксама госці з г. Палеска Калінінградскай вобласці Расіі - Інтэрнацыянальны музычна-драматычны тэатр "Лабіаў". Іх інтэрпрэтацыя вядомага твора Л.Філатава "Пра Фядота-стральца" дзве гадзіны захапляла публіку непасрэднасцю выяўлення.
Фестываль як іспыт
Дырэктар Мінскага абласнога цэнтра народнай творчасці Раіса Вайцяхоўская заўважыла, што на Міншчыне вельмі моцныя тэатральныя традыцыі. "Сёння, - распавяла яна, - складана ўтрымаць гэты жанр, бо ён вымагае фінансавых укладанняў, неардынарнага рэжысёрскага мыслення, карпатлівай работы. Вельмі няпроста падабраць пэўны тыпаж акцёра на патрэбную ролю... Фестываль для ўдасканалення аматарскіх тэатраў - проста неабходны. Калі ты трапіў на "Бярэзінскую рампу", дык адпавядаеш узроўню народнага тэатра. Тут можна пабачыць узор, прыклад таго, як трэба працаваць".
Разумеюць важнасць існавання такога фестывалю і ўлады: вялікую фінансавую падтрымку аказаў Мінаблвыканкам, за што яму ўдзячныя іншыя арганізатары: Мінскі абласны цэнтр народнай творчасці, Бярэзінскі райвыканкам. Гэтым разам падзею прафінансавала не толькі ўпраўленне культуры, але і аддзел па справах моладзі. Дзякуючы гэтаму на фестываль трапілі госці з Палеска. Далучыўся сёлета да форуму і Беларускі фонд міру, які заснаваў свой прыз.
Мікалай Пытляк адзначае, што не ўсе тэатры могуць трапіць у конкурсную праграму. Пад час папярэдняга адбору ўвага звяртаецца на рэпертуар, якасць спектакляў, жанры. "За тры дні, - зазначыў ён, - можна паказаць шэсць - сем пастановак, і мы імкнёмся, каб яны былі разнастайныя. Добра, на мой погляд, што мы не абмяжоўваемся ў драматургіі: дэманструем як класіку, так і сучаснае айчыннае і замежнае мастацтва. Удзельнікі не паўтараюцца ў творах, ды і надта старыя спектаклі да нас не вязуць. У іх ёсць мэта: за два гады падрыхтаваць не нешта шараговае, камерцыйнае, а сапраўды фестывальны спектакль".
Традыцыйна ў форуме прымае ўдзел народны тэатр драмы і камедыі імя У.Галубка са Слуцка, які гэтым разам падрыхтаваў спектакль "А досвіткі тут ціхія", па-свойму яго пераасэнсаваўшы. Таксама заўсёды чаканыя пастаноўкі Заслужанага аматарскага калектыву імя Уршулі Радзівіл Нясвіжскага раённага цэнтра культуры і адпачынку пад кіраўніцтвам Яўгена Валабоева, што выступіў на самай першай "Бярэзінскай рампе". Яго драма "Я заўсёды ўсміхаюся" таксама прысвечана ваеннай тэме. Званне "заслужаны" нядаўна атрымаў яшчэ адзін часты ўдзельнік форуму - драматычны тэатр "Відарыс" Палаца культуры імя М.Горкага з Барысава. Артысты паказалі "Тэлешоу" па п'есе Андрэя Курэйчыка.
Здабыткі і будні
Да трох фестывальных дзён тэатральныя калектывы рыхтаваліся грунтоўна. У вобласці раз у тры гады, пры пацвярджэнні званняў "народны" і "ўзорны", тэатры паказваюць, чым яны жывуць і на якім узроўні знаходзяцца. Пры гэтым адсочваюцца будучыя ўдзельнікі "...Рампы". Два семінары ў год наведваюць кіраўнікі аматарскіх калектываў у Мінскім абласным драматычным тэатры ў Маладзечне, праводзяцца стажыроўкі рэжысёраў пад час "Бярэзінскай рампы" і іншага абласнога фестывалю - "Чароўнага куфэрка".
Рэжысёр тэатра "Відарыс" з Барысава Уладзімір Буйко адзначыў некалькі складанасцей, з якімі даводзіцца сутыкацца ў паўсядзённай працы: "За шэсць гадоў мы ні разу не атрымалі грашовай падтрымкі, і фінансавае пытанне - самае для нас цяжкае. Трэба дзякаваць тым людзям, акцёрам аматарскіх калектываў, якія адпрацавалі па восем гадзін на сваёй працы і прыйшлі выконваць ролі. Ім самім даводзіцца рабіць дэкарацыі, касцюмы... Працуюць на энтузіязме, усёй душой! Упэўнены, што падтрымліваць сёння варта не толькі прафесійныя, але і аматарскія тэатры".
Узначальвае журы на фестывалі ў Беразіне народная артыстка Беларусі Марыя Захарэвіч, што служыць Нацыянальнаму акадэмічнаму тэатру імя Янкі Купалы. Яна распавяла, што яе місія - не з лёгкіх, бо ўсе спектаклі маюць высокі ўзровень: "З кожным годам мы бачым, як растуць тэатры. Прыняць удзел у "Бярэзінскай рампе" - як здаць дзяржаўны іспыт". Кожны з тэатраў быў адзначаны на фестывалі ўзнагародай. Журы вылучыла пэўныя якасці спектакляў і творчыя дасягненні акцёраў.
наш спецыяльны карэспандэнт
Мінск - Беразіно - Мінск
Фота Паўла ЦЫБІНА
На здымках: спектаклі - удзельнікі "Бярэзінскай рампы".