Швейная машынка для розных пакаленняў - не проста абавязковы атрыбут сямейнага побыту, але і культурны ды тэхналагічны фетыш, прадмет мастацтва, фамільная рэліквія і сродак творчай рэалізацыі. А на сённяшні дзень яна ўжо з'яўляецца аб'ектам калекцыяніравання.
Беларусі ў гэтым сэнсе пашанцавала: размешчаная ў сэрцы Еўропы, яна ўяўляе з сябе своеасаблівы цэнтр, дзе можна пабачыць швейныя машынкі вытворцаў з усяго свету. Да ўсяго, дадзеная выстаўка важная яшчэ і тым, што ў мястэчках і гарадах нашай зямлі здаўна складвалася шырокая рамесніцкая вытворчасць.
У рамках выстаўкі наведвальнікі атрымаюць разгорнутую інфармацыю аб асноўных вытворцах швейных машын XIX - XX стст., убачаць спадарожныя атрыбуты краўцоў (манекены, нажніцы, прасы, тэкстыль мінулага), ілюстрацыйны матэрыял па гісторыі моды і рэкламы. Фактычна, экспазіцыя - яшчэ адна рыса да гістарычнага партрэта эпохі мадэрнізму.