У кожным рэгіёне былі свае асабліва шанаваныя святыя. Да іх і ставіліся з надзвычайнай павагай, як да самых блізкіх і старэйшых родзічаў. Ікона з выявай святога мела сваё месца і значэнне ў жыцці вясковага жыхара і перадавалася з пакалення ў пакаленне. Часта абразы, якія страцілі з часам свае фарбы, гаспадары самі, як маглі, абнаўлялі, "запісвалі" выяву, што сцерлася, новым вобразам.
Сярод святых найбольш шанаванымі былі Мікалай Цудатворац, Варвара Пакутніца і Параскева Пятніца, аб чыім заступніцтве прасілі ў штодзённых патрэбах. Найбольш распаўсюджанымі былі іканаграфічныя тыпы выяў Хрыста - Пантакратар - і Багародзіцы: Адзігітрыя - Трохручыца, Ціхвінская і Казанская, Элеуса - Пачаеўская і Панахранта (Маці Божая на прастоле). Багаты свет біблейскіх падзей адлюстраваны на абразах "Нараджэнне Хрыста", "Каранаванне Дзевы Марыі", "Бог Саваоф", "Святая сям'я", "Маці Божая з Ісусам Хрыстом і Іаанам Хрысціцелем".
Пры гэтым, найбольш адметнымі былі абразы, створаныя не прафесійнымі іканапісцамі, а народнымі майстрамі. Яны бытавалі, у асноўным, як хатнія, але ж часам сустракаліся і ў вясковых храмах. Менавіта такія унікальныя ўзоры мастацтва будуць прадстаўлены на выстаўцы "Беларускія народныя абразы", што адкрыецца ў межах "Славянскага базару..." у Віцебскім абласным краязнаўчым музеі. Усе іконы, а гэта звыш 30 унікальных твораў народнага мастацтва Заходняга і Усходняга Палесся, Падняпроўя ХІХ - пачатку ХХ стагоддзяў, знаходзяцца ў зборы іканапісу Беларускага дзяржаўнага музея народнай архітэктуры і побыту, куды трапілі ў выніку шматлікіх экспедыцый па Беларусі, якія праводзяцца з 1977 года.
Як адзначылі карэспандэнту "К" у Беларускім дзяржаўным музеі народнай архітэктуры і побыту, народныя абразы, багатая спадчына якіх арганічна знітоўвае розныя этнічныя і канфесійныя традыцыі, характарызуюць сінтэз кананічнага візантыйскага іканапісу, заходнееўрапейскага сакральнага жывапісу і прыёмаў народнага дэкаратыўнага мастацтва.
На ілюстрацыі: народны абраз з выявай Божай Маці.