Кожны з трох суддзяў, якія прадстаўлялі Беларусь, Расію, Украіну, даказаў сваё "права голасу" сольным выступленнем. Калі ж у іх узнікалі сумневы, канкурсантам прадастаўляліся дадатковыя выхады - для вызначэння пераможцаў, а на адборачных турах "вердыкт" можна было нават "аспрэчыць". За дзве гадзіны да фінальнага брэйк-рынгу на той жа сталічнай пляцоўцы быў праведзены так званы "суцяшальны тур". У выніку да 21 раней адабранага дуэта далучыліся яшчэ 6, што перамаглі пад час "суцяшэння".
Арганізатары прыклалі ўсе намаганні, каб зрабіць спаборніцтва максімальна відовішчным, бяспечным і карысным. На мармуровую падлогу паклалі спецыяльнае пакрыццё, размалявала яго каманда мастакоў графіці з БНТУ. А цырымонія афіцыйнага адкрыцця ўключала гістарычны экскурс у паходжанне брэйка і суквецце яго стыляў. Дый традыцыйнае "разразанне стужачкі", якім завяршыў сваё сціслае прывітанне першы сакратар ЦК БРСМ Ігар Бузоўскі, суправаджалася інтэлігентным "стаяннем на галаве" двух танцораў, да ног якіх і была прымацавана тая стужка. Пераможцам стала мінская каманда ў складзе Дзмітрыя Зінкевіча і Яўгена Чарняўскага (абодва яны - удзельнікі зборнай Беларусі па брэйк-дансу), на другое месца выйшлі "Два ствалы" (Жодзіна, Слуцк), на трэцяе - "дуэт" магіляўчан.