Міжнародны дзень славянскага пісьменства і культуры, а таксама Дзень памяці святых Кірылы і Мяфодзія 24 мая былі пазначаны вялікім хрэсным ходам, які прайшоў у цэнтры сталіцы.
Урачыстасці распачаліся богаслужэннем у Мінскім Свята-Духавым кафедральным саборы, пасля ўрачыстая працэсія накіравалася да месца, дзе была закладзена ў ХІ стагоддзі першая ў Мінску царква, а ў 1995 годзе — камень у гонар 200-годдзя Мінскай епархіі. Там адбыўся малебен, прысвечаны святым роўнаапостальным Кірыле і Мяфодзію.Усё жыццё балгарскіх братоў было прыкладам самаадданага служэння людзям, адзначыў, адкрываючы ўрачыстую акцыю, Мітрапаліт Мінскі і Слуцкі Філарэт, Патрыяршы Экзарх ўсяе Беларусі.Ужо сталася традыцыяй, што беларусы наведваюцца на старое месца, якое называецца замчышчам, дзе зарадзіўся Мінск, дзе былі закладзены першыя храмы, знаходзіліся фартэцыя, замак, у якім стаяў старажытны Храм Нараджэння Прасвятой Багародзіцы. Браты Кірыла і Мяфодзій былі пасланы на славянскія землі і сталі першымі асветнікамі.Першы намеснік міністра культуры Рэспублікі Беларусь Уладзімір Рылатка ў сваім слове адзначыў, што гэтае свята для беларусаў — свята духоўнага ачышчэння.У Беларусі будуюцца новыя цэрквы, бібліятэкі, ствараюцца новыя мастацкія творы. Нацыянальная бібліятэка стала гонарам краіны. Наш народ ідзе тым шляхам, які ўказалі славянскія браты, а ўслед за імі праклалі асветнікі, мысліцелі ўсяго славянскага свету і асветнікі беларускай зямлі. Намеснік Упаўнаважанага па справах рэлігій і нацыянальнасцей пры Савеце Міністраў Рэспублікі Беларусь Уладзімір Ламека зазначыў, што асветнікі Кірыла і Мяфодзій далі беларусам ключы да пісьменства — кірылічную азбуку. Беларусь таксама дала свету выдатных прадстаўнікоў, якія годна прадоўжылі справу Кірылы і Мяфодзія. У вялікай кагорце самых слынных і яркіх кветак Беларусі — Кірыла Тураўскі, Еўфрасіння Полацкая, Францішак Скарына, якія стаяць ля самых вытокаў беларускай нацыянальнай духоўнай спадчыны.
Надзвычайны і Паўнамоцны Пасол Рэспублікі Балгарыя ў Рэспубліцы Беларусь, доктар Петка Ганчаў, прадстаўнік краіны, дзе нарадзіліся браты Кірыла і Мяфодзій, зазначыў: для сучаснай Балгарыі Дзень славянскага пісьменства — самае папулярнае народнае свята.
У гэты ж дзень у Інстытуце тэалогіі імя святых Кірылы і Мяфодзія Беларускага дзяржуніверсітэта распачаліся ХІІІ Міжнародныя Кірыла-Мяфодзіеўскія чытанні, прысвечаныя Міжнароднаму дню славянскага пісьменства і культуры. У арганізацыі мерапрыемства прынялі ўдзел Міністэрства культуры Рэспублікі Беларусь, Беларускі дзяржаўны універсітэт культуры і мастацтваў. У працы форуму, які працягнецца да 26 мая, возьмуць удзел прадстаўнікі Міністэрства адукацыі РБ, НАН РБ, пасольстваў, акрэдытаваных у Беларусі, ВНУ Мінска, Гродна, Гомеля, Віцебска, Магілёва, Полацка. А таксама — госці з Італіі, Германіі, Украіны, Расіі, Сербіі, Швейцарыі.
Наталля КІРПІЧЭНКАВА