Прадстаўленыя на выстаўцы работы - пераважна пейзажы, што адлюстроўваюць краявіды радзімы. Але і ў такіх, здавалася б, абмежаваных умовах - у межах адной экспазіцыі - удалося паказаць два розныя позіркі на рэчаіснасць, розныя падыходы да творчасці, нарэшце, розныя стылі і тэхнікі. Так, калі палотны алеем Уладзіміра Сайко гледачы называюць "па-вясковаму цёплымі", то урбаністычныя творы Дзяніса Іванова (ад батыка да малюнкаў пастэллю) ужо не такі мяккія - халаднейшыя за работы калегі і па каларыце, і па змесце.
Так склалася, што поруч з паняццем "малады творца" ў сучасным успрыняцці згадваецца і "авангард", "канцэптуальнае мастацтва". Але ў творах Уладзіміра і Дзяніса - навучэнцаў гімназіі-каледжа мастацтваў імя І.В. Ахрэмчыка - акадэмізм пакуль што пераважае над аўтарскімі адкрыццямі, мудрагелістым стылем, і, магчыма, таму іх рэалістычныя замалёўкі штодзённага жыцця Бацькаўшчыны становяцца яшчэ больш зразумелымі і блізкімі шырокаму гледачу. Абодва хлопцы - неаднаразовыя ўдзельнікі і пераможцы шэрагу мастацкіх конкурсаў і экспазіцый. Персанальная выстаўка для іх - таксама не дзіва. Але такі праект, дзе юнакам давялося працаваць у тандэме, супастаўляючы розныя погляды на падобныя рэчы, - важны вопыт для кожнага з іх і значны ўнёсак у скарбонкі творчых заваёў.