Пад сцягам любімай Айчыны,
Свабоднай, заўжды маладой
І нам назаўсёды адзінай,
Як сонца над роднай зямлёй,
Ідзём мы да светлае мэты,
Каб наша Айчына была
Не толькі у песнях апета,
А ў кожнага ў сэрцы жыла.
Прыпеў:
Мы - твая душа, Айчына-маці,
Мы - работнікі культуры,
Людзям мы прыносім шчасце.
Хай квітнее Беларусь!
Культура - багацце святое,
Якое нам тут берагчы,
Дзе роднае слова жывое,
Нібыта ад Храма ключы.
Культурай квітнее Айчына,
Культура яднае людзей.
І лепш за Айчыну краіны
Не знойдзеш на свеце нідзе.
Прыпеў.
Дубль два!
Да Дня работнікаў культуры па просьбе нашай газеты народны артыст СССР, народны артыст Беларусі, кампазітар Ігар Лучанок і вядомы паэт Віктар Шніп напісалі песню-прысвячэнне "Культурай квітнее Айчына" (гл. "К" № 41 за 2009 г.). Новы твор выклікаў вялікі рэзананс сярод нашых чытачоў. Паводле паведамленняў з рэгіёнаў, у многіх клубах яе ўжо пачалі развучваць і спяваць. Адзін жа з нашых падпісчыкаў - Мікола Яцкоў з вёскі Брылі так натхніўся вершам, што даслаў свой варыянт песні пад назвай "Культура - багацце святое". Дадамо, што М.Яцкоў - далёка не навічок у песеннай творчасці: яго кампазіцыі запісаны на радыё, выдаваліся ў зборніках. Трэба спадзявацца, яшчэ адно прысвячэнне работнікам культуры таксама знойдзе сваіх прыхільнікаў - тым больш, што прапанаваная М.Яцковым мелодыя прыдатная для выканання нават аматарамі-пачаткоўцамі.