 |
Дык вось, лічбы і факты. Бібліятэчныя ўстановы цягам апошніх 10 гадоў у раёне не скарачаліся. Бібліобус дзейнічае з 2007-га, у рэйс адпраўляецца 2 - 3 разы на тыдзень. Графік выездаў у кожную з 50-ці вёсак раёна ёсць у кожным сельсавеце. Усе 44 бібліятэкары дзейнічаюць на поўных стаўках, адказнасць усведамляюць цудоўна. Доказам таму - шматлікія аўтарскія праекты. Напрыклад, пры бібліятэцы аграгарадка "Антонаўка" дзейнічае клуб "Прырода і фантазія", які заняў трэцяе месца ў Рэспубліканскім конкурсе бібліятэчных фарміраванняў. Сапраўды, вырабы з прыродных матэрыялаў - унікальныя, а сістэма экалагічнага выхавання вартая пераймання ў ЦБС іншых раёнаў. І яшчэ пра адзін праект, што дзейнічае на Чавусчыне. Называецца ён "Ты і твая бібліятэка". Мэта - прафарыентацыя школьнікаў. У выніку гэтай работы некалькі юных чытачоў з сяла паступілі ў Магілёўскі бібліятэчны тэхнікум. Красамоўнай заслугай Алены Петраковай з'яўляецца і тое, што ў бібліятэках раёна існуе на сёння 20 відаў платных паслуг, а летась па ЦБС зароблена ў выніку іх аказання 11 мільёнаў рублёў. Частка грошай, натуральна, пайшла на развіццё бібліятэчнай справы Чавусчыны.
А.С. На здымку: дырэктар Чавускай ЦБС Алена Петракова.
Фота аўтара