ВІДЭАІМПРЭЗЫ АНЛАЙН
Мяркую, ніхто не будзе спрачацца з тым, што сёння, падчас эпідэміі Covid19, наяўнасць віртуальных зносін з чытачамі — важны складнік паспяховай дзейнасці любой абласной, раённай дый сельскай бібліятэкі Беларусі. З гэтай прычыны інтэрнэт-жыццё многіх айчынных бібліятэк за апошнія два гады набыло зусім іншыя абрысы — на многіх сайтах з’явіўся разнастайны і цікавы кантэнт, а афармленне старонак у інтэрнэце часам прыцягвае ўвагу наведвальнікаў не менш за тэкставую інфармацыю.
Напрыклад, раю ўсім ахвотным зайсці на сайт Любанскай раённай цэнтральнай бібліятэкі, на якім нават размешчаны асобны падраздзел “Электронная прадукцыя”, дзе можна паглядзець відэапраекты, відэафільмы, буктрэйлеры, віртуальныя выставы і выніковыя фільмы-справаздачы пра дзейнасць мясцовых бібліятэкараў цягам усяго года.
— Яшчэ ў нас ладзяцца шматлікія інтэрнэт-конкурсы, інтэрнэт-флэшмобы, — кажа намеснік дырэктара Любанскай РЦБ Таццяна Ермакова. — Усе гэтыя мерапрыемствы аператыўна з’яўляюцца на нашым сайце і на нашых старонках у сацыяльных сетках. Працу ў інтэрнэт-прасторы будзем актыўна праводзіць і надалей, бо сёння мы пераходзім у лічбавае асяроддзе, а да гэтага трэба быць падрыхтаваным, трэба рабіць і змяшчаць на нашым бібліятэчным сайце разнастайны і якасны кантэнт, які будзе цікавы ў першую чаргу моладзі.
Нядаўна ў Любанскай раённай бібліятэцы быў зладжаны раённы бібліятэчны сеткавы конкурс-чэлендж чытальнікаў “Сцежкамі Івана Муравейкі”, падчас якога трэба было прадэкламаваць паэтычныя і празаічныя творы. Папулярызацыя беларускай літаратуры на аснове творчай спадчыны пісьменніка-земляка Івана Муравейкі, як адзначыла Таццяна Ермакова, прайшла з вялікай колькасцю ўдзельнікаў.
Дарэчы, па словах суразмоўцы, хоць цяпер, падчас пандэміі, наведвальнікаў назіраецца менш, чым звычайна, колькасць віртуальных карыстальнікаў як сайта, так і сацыяльных сетак Любанскай РЦБ значна ўзрасла — прыкладна ў 3-4 разы.
А яшчэ ў Любані вельмі добра супрацоўнічаюць з расійскімі бібліятэкарамі, у прыватнасці з Чалябінска, ладзячы канферэнцыі на платформе Zoom. Так, да слова, робяць і ў Кобрыне, што ў Брэсцкай вобласці.
— Напрыклад, клуб “Паэтыка”, які дзейнічае пры Кобрынскай раённай бібліятэцы, праводзіць не толькі рэальныя сустрэчы, але таксама і анлайн-мерапрыемствы, — адзначыла “К” дырэктар мясцовай РЦБС Ларыса Легацюк. — Так, да Дня народнага адзінства члены клуба зладзілі сумеснае анлайн-пасяджэнне з сябрамі з Бранска.
Падобныя анлайн-сустрэчы ладзяцца з дапамогай платформы Zoom, а для ўсіх ахвотных бібліятэкары пакідаюць адрас электроннай пошты ці нумар у Viber, каб госці змаглі атрымаць запрашэнне на відэаімпрэзу.
Дадам, што сёлета за актыўную дзейнасць па зборы, сістэматызацыі і папулярызацыі матэрыялаў пра ганаровых грамадзян кобрынскага краю цэнтральная раённая бібліятэка была ўзнагароджана дыпломам II cтупені па выніках абласнога тура XXIX Рэспубліканскага конкурсу “Бібліятэка — асяродак нацыянальнай культуры”.
РЭЛАКС ПАД КНІГУ
А цяпер — на Гродзеншчыну. У Воранаўскай раённай бібліятэцы сёлета ўвялі шэраг новых паслуг, сярод якіх гульнявая праграма “Дзень нараджэння ў бібліятэцы”, віншаванні ад казачных герояў, стварэнне відэаролікаў і прэзентацый. Гэтыя новаўвядзенні значна паспрыялі ў выкананні плана платных паслуг. Але ж, натуральна, ладзіліся і традыцыйныя мерапрыемствы, на якія маглі завітаць усе ахвотныя.
— Вельмі цікава прайшла ў нас бібліяноч пад назвай “Кніжны рэлакс”, якая вельмі спадабалася нашым наведвальнікам, — адзначыла дырэктар Воранаўскай раённай бібліятэкі Наталля Камінская. — Многія потым падыходзілі да супрацоўнікаў, дзяліліся з імі сваімі ўражаннямі і казалі, што нават не чакалі такой цікавай і захапляльнай праграмы.
У гэты вечар уваход у бібліятэку быў адкрыты абсалютна для ўсіх, а на першым паверсе гасцей сустракаў прывід, які раздаваў свае прадказанні кожнаму наведвальніку. На другім паверсе ўдзельнікаў чакалі розныя забаўкі, тэматычныя кніжныя выставы, бібліябар, дзе можна было замовіць меню з кніг, а таксама святочная праграма, падчас якой Гары Потэр, Бураціна, Папялушка і іншыя літаратурныя героі сышлі са старонак кніг, каб у гэты вечар здзіўляць гасцей бібліятэкі.
Таксама, па словах Наталлі Камінскай, бібліятэкары пастаянна працуюць з маладымі чытачамі. Так, Воранаўская раённая бібліятэка арганізавала патрыятычны флэшмоб “Памяць давяраем маладым”, прысвечаны 80-годдзю з часу пачатку Вялікай Айчыннай вайны. Пачытаць на свежым паветры вершы пра вайну маглі, дарэчы, не толькі маладыя людзі, але і ўсе ахвочыя.
На самім жа сайце Воранаўскай раённай бібліятэкі размяшчаюцца відэаагляды новых кніг, матэрыялы па краязнаўстве, інфармацыя пра разнастайныя праграмы, конкурсы і праекты бібліятэкараў ды шмат што яшчэ. Так што з інтэрнэтам бібліятэкары сябруюць стала і сур’ёзна.
ВЫЙСЦЕ НА ПЕРСПЕКТЫВУ
А вось у Брагіне, што ў Гомельскай вобласці, з сайтам пакуль што не ўсё так пазітыўна.
— На жаль, пакуль бібліятэчнага сайта ў нас няма, — расказала мне дырэктар Брагінскай ЦРБ Галіна Карпенка. — Таму актыўнічаем у сацыяльных сетках, размяшчаем там агляды новай літаратуры, відэаролікі, зробленыя да знакавых дат. Напрыклад, нядаўна размясцілі відэаролік да 130-годдзя з дня нараджэння Максіма Багдановіча. Таксама робім апытальнікі, ладзім анкетаванне, каб даведацца, якую новую літаратуру хацелі б чытаць нашы наведвальнікі. І, натуральна, набываем больш новай літаратуры, прычым як беларускай, так і расійскай, для нашай моладзі.
Як адзначыла напрыканцы нашай размовы Галіна Карпенка, стварэнне бібліятэчнага сайта ў Брагіне — праца на бліжэйшую перспектыву.
Да слова, актыўнічаюць у сацыяльных сетках і ў Расонах Віцебскай вобласці. Праўда, не забываючыся на абнаўленне свайго сайта.
— Якраз сёлета мы адкрылі сваю старонку ў адной з сацыяльных сетак, — адзначыла дырэктар ЦБС Расонскага раёна Наталля Рыбакова. — Усё ж такі цяпер на нашы традыцыйныя бібліятэчныя мерапрыемствы ходзіць не так шмат людзей, як звычайна, таму мы пачалі актыўна асвойваць інтэрнэт-прастору. Наведваюць нашы старонкі ў сацыяльных сетках больш, чым раней, праўда, на жаль, гэта ў асноўным нашы сталыя падпісчыкі, а не новыя госці.
На сайце ЦБС Расонскага раёна змяшчаюцца навіны бібліятэчнага жыцця, інфармацыя па краязнаўстве, віртуальныя выставы, аб’явы ды многае іншае, як, дарэчы, і на іншых бібліятэчных сайтах Беларусі. Так што важнасць сваёй прысутнасці ў Сеціве айчынныя бібліятэкары разумеюць.
ПАДКАСТЫ Ў ДАПАМОГУ
Стала прысутнічаюць у інтэрнэце і бібліятэкары Магілёўшчыны. Так, у горадзе Круглае мясцовыя бібліятэкары значную ўвагу аддаюць, сярод іншага, краязнаўству, выкарыстоўваючы пры гэтым найноўшыя тэхналогіі.
— Мы паўдзельнічалі ў абласным конкурсе, прысвечаным збору інфармацыі пра свой родны край, — адзначыла дырэктар Круглянскай цэнтралізаванай бібліятэчнай сістэмы Вольга Цалавальнік. — Пад гэты конкурс зрабілі цэлы цыкл відэаролікаў, якія пазней размясцілі і на нашым сайце, і ў сацыяльных сетках. Гэта фактычна відэафільмы, у якіх расказваецца пра цікавыя мясціны ці адметнасці нашага раёна, такія відэаэкскурсіі па Кругляншчыне. Натуральна, плануем працягваць гэтую працу і надалей.
Таксама нядаўна супрацоўнікамі дзіцячай бібліятэкі быў створаны падкаст “Казкі Алены Кобец-Філімонавай” — дзіцячай пісьменніцы, ураджэнкі мястэчка Круглае. Кожны ахвотны цяпер можа праслухаць казкі пісьменніцы цалкам бясплатна на старонках бібліятэкі ў сацыяльных сетках.
Паколькі маладое пакаленне ўсё больш камунікуе ў сацыяльных сетках, бібліятэкары вырашылі прыцягнуць увагу карыстальнікаў менавіта ў сацсетках і з 20 лістапада па 14 снежня зладзілі ў Сеціве флэшмоб “Мы — равеснікі”. Для ўдзелу ў акцыі дастаткова было даслаць ці прымацаваць свой фотаздымак з кнігай да запісу на старонцы бібліятэкі ў інтэрнэце. Ад удзельнікаў патрабавалася толькі адна ўмова — год выдання кнігі і год іх нараджэння павінны былі быць аднолькавымі.
А яшчэ ў Круглянскай цэнтральнай раённай бібліятэцы прапануюць шмат платных паслуг. Акрамя традыцыйных ксеракопіі, ламініравання, раздрукоўкі, сканавання дакументаў ці брашуравання, сёлета, па словах Вольгі Цалавальнік, дадалася і новая — выраб арыгінальнай паштоўкі метадам “скрапбукінга” (ці, больш дакладна, кардмейкінга). Гэта, патлумачу ў двух словах, калі вясельная, юбілейная ці святочная паштоўка ўрачыста і прыгожа афармляецца або пры дапамозе графічных рэдактараў на камп’ютары, або нават уручную, сваімі рукамі.
Зразумела, што і каштаваць падобная паштоўка будзе значна больш, чым звычайная, якую можна набыць у любым шапіку ці на пошце. Так, кошт паштоўкі ад круглянскіх бібліятэкараў, як паведамляецца на старонцы бібліятэкі ў адной з сацыяльных сетак, з 1 кастрычніка складае 8 рублёў 52 капейкі. Што ж, цікавая інавацыя, якую, дарэчы, мне яшчэ не даводзілася сустракаць падчас шматлікіх камандзіровачных выездаў.
Так што, калі камусьці з айчынных бібліятэкараў трэба знайсці новыя платныя паслугі, заўсёды можна параіцца з калегамі з Круглага. А па інавацыі і новыя віртуальныя цікавосткі можна звяртацца літаральна да любога бібліятэчнага сайта Беларусі. Зрэшты, сёння, у часы найноўшых інтэрнэт-тэхналогій, па-іншаму проста і быць не можа.