Рэжысёрам выступіла прыма гэтага тэатра, народная артыстка Беларусі Вольга Клебановіч. Мастацкім кіраўніком пастаноўкі — заслужаны дзеяч мастацтваў нашай краіны Сяргей Кавальчык. Гэты творчы тандэм стварыў і саму інсцэніроўку, бо спрэсаваць у п’есу буйны і надзвычай разгалінаваны празаічны тэкст надзвычай складана: кожны пастаноўшчык абірае неабходны яму ракурс.
Незвычайнае і надзвычай сучаснае рашэнне сцэнічнай прасторы, прапанаванае Аляксандрай Карнажыцкай, выводзіць аповед на пазачасавы, папраўдзе касмічны ўзровень. А некаторыя дэталі сцэнаграфіі і касцюмы гэтай жа мастачкі больш шчыльна звязаны з закранутай эпохай.
Сям’ю Карамазавых увасобілі Аляксандр Палазкоў (бацька), Ягор Траццякоў (Іван), Руслан Чарнецкі (Дзмітрый), Сяргей Жбанкоў (Аляксей), Сяргей Савянкоў (пазашлюбны сын Павел Смердзякоў). Вераніка Пляшкевіч бліскуча ператварылася ў Грушаньку. Адразу ў дзвюх ролях Чорта і Следчага паўстаў Дэвід Разумаў. У спектаклі таксама занятыя заслужаны артыст Беларусі Валерый Шушкевіч (Старац Зосіма), Дзяніс Нямцоў (Паляк), Віталіна Бідзюк (Кацярына Іванаўна), Вікторыя Кавальчык (Хахлакова) і інш.
Фота Таццяны МАТУСЕВІЧ