 |
А.Савіч. “Энергія рыб”. |
У сур’ёзным інтэр’еры і дзівацтвы падаюцца нейкім важным знакам, маюць прыхаванае значэнне. Прыхаванае, таму што мастак не гаворыць “рэалістычнай” мовай — усе прадметы паказаны праз прызму ягоных думак аб будучыні або цяпершчыне.
Чалавечае жаданне падпарадкаваць сабе прыроду і атрымаць энергію з кожнай яе дробязі бачна на сумным палатне з мастакоўскім абазначэннем “Power of fish” (“Энергія рыб”). Тры няшчасныя рыбіны жывуць у складаным скафандры — ці то ў забруджаным акіяне, ці то на паверхні заледзянелай зямлі — і дзейнічаюць, але нават з іх, бездапаможных, таксама намагаюцца атрымліваць нейкую карысць. Зусім іншая энергетыка — на двух палотнах з выявамі перцаў: яны так “палаюць”, што ад іх нібы адскокваюць іскрынкі.
Любіць Андрэй Савіч закранаць сямейную тэму. Праз вобразы жаночых ножак на высокіх абцасах мастак здолеў паказаць сур’ёзнасць адносін паміж мужчынай і жанчынай. Адна нага на пэўным жыццёвым этапе затаптала сумнавокага мужчыну, другога пакінула ў роздуме, трэці ляжыць каля яе. І ў самым нізе, каля абцаса, вісіць дзіцячая соска. Дзіця на пасля… Але ці не выльецца ўсё гэта заўтра ў боль, калі вены на такіх прыгожых ножках распухнуць, будуць нагадваць пра вясёлую маладосць?
Фотаграфіка творцы прыцягвае ўвагу сваёй нязвыклай трактоўкай рэчаіснасці.
Алена САБАЛЕЎСКАЯ