Маладзечна рыхтуецца да фэсту

№ 10 (1501) 06.03.2021 - 12.03.2021 г

Пачалася актыўная падрыхтоўка да правядзення ХХ Нацыянальнага фестывалю беларускай песні і паэзіі “Маладзечна — 2021”, правядзенне якога запланавана на 11 — 12 чэрвеня 2021 года.

3 сакавіка 2021 года прайшло пасяджэнне пастаянна дзеючага арганізацыйнага камітэта па падрыхтоўцы фестывалю пад старшынствам міністра культуры А.М.Маркевіча і намесніка старшыні Мінскага аблвыканкама І.С.Маркевіча

На пасяджэнні абмяркоўваліся арганізацыйныя пытанні, праграма фестывалю і яго асноўныя мерапрыемствы. У аснове канцэпцыі дадзенага фестывалю — юбілейная дата (20-годдзе) Нацыянальнага фестывалю беларускай песні і паэзіі.

Нацыянальны фестываль беларускай песні і паэзіі — адзін з найбуйнейшых творчых форумаў. Арганізатарамі фестывалю з’яўляюцца Міністэрства культуры, Мінскі аблвыканкам, Маладзечанскі райвыканкам, Нацыянальны акадэмічны аркестр сімфанічнай і эстраднай музыкі Рэспублікі Беларусь, Белтэлерадыёкампанія.

Урачыстае адкрыццё музычнага форуму пройдзе на галоўнай пляцоўцы свята — сцэне летняга Амфітэатра 11 чэрвеня.

Цэнтральнай падзеяй фестывалю стане Нацыянальны конкурс маладых выканаўцаў беларускай эстраднай песні, у якім прымуць удзел выканаўцы з усіх абласцей краіны і г. Мінска. Фінальным акордам фестывалю стане канцэрт-закрыццё ХХ Нацыянальнага фестывалю беларускай песні і паэзіі “Маладзечна — 2021”, які адбудзецца 12 чэрвеня на галоўнай пляцоўцы музычнага свята — у летнім Амфітэатры.

На працягу двух фестывальных дзён разгорнуць працу адкрытыя пляцоўкі, якія размесцяцца на Цэнтральнай плошчы, вуліцы Прытыцкага, у гарадскім парку культуры і адпачынку імя Перамогі, кінатэатры “Радзіма”.