Напрыканцы мінулага года пэўным чынам умацавалася матэрыяльна-тэхнічная база бібліятэк раёна. Тэлефанізавана сем устаноў, многія сельскія бібліятэкі падключаны да сеціва. Набыта дзесяць новых камп’ютараў, столькі ж — МФУ (апаратаў з функцымі прынтара і сканера).
Пераможцы V рэспубліканскага конкурсу “Бібліятэка — цэнтр духоўнай асветы і выхавання” названы яшчэ летась. Цэнтральная бібліятэка імя Аляксандра Пушкіна заняла ў конкурсе першае месца і атрымала грамату Патрыяршага Экзарха, а таксама — камплект праваслаўных кніг. Сапраўды, асветніцтва, фарміраванне духоўна-маральных якасцяў асобы, выхаванне патрыятызму і грамадзянскасці на аснове праваслаўных традыцый — прыярытэтны бок дзейнасці ўстановы.
Бібліятэка імя Пушкіна актыўна ўдзельнічала ў Рэспубліканскай дабрачыннай акцыі “Нашы дзеці”. За апошнія дні мінулага года бібліятэкары правялі для дзятвы Оршы і раёна 14 святочных тэатралізацый.
Сёлета адзначаецца 110-годдзе падпольшчыка Канстанціна Заслонава. У дзіцячай бібліятэцы імя Уладзіміра Караткевіча стартаваў праект “Успомнім тых, хто легендай авеяны”. Гэта адзін са складнікаў доўгатэрміновай праграмы “Краязнаўчая майстэрня”. Натуральна, што рэалізоўваецца яна сёлета пад эгідай 75-годдзя Вялікай Перамогі.
4 лютага ў цэнтральнай бібліятэцы была прэзентавана новая кніга аршанскага пісьменніка Сяргея Кулакова “Калі не позна дараваць”. Твор распавядае пра спрадвечныя сямейныя каштоўнасці. Дасведчаныя кажуць, што чытаецца — на адным дыханні. Можна паверыць, бо аўтар напісаў больш за два дзясяткі кніг.
Бібліятэка імя Аляксандра Пушкіна распачала рэалізацыю новага праекта — “Гуляем разам!” Кожную нядзелю ў чытальнай зале ладзяцца настольныя гульні. Тут можна знайсці новых сяброў, аднадумцаў, атрымаць процьму станоўчых эмоцый.
У пачатку 2020-га пасля капітальнага рамонту адкрылася абноўленая Бабініцкая сельская бібліятэка-клуб. 1 лютага тут выступіў з канцэртам народны клуб “Надзея” Андрэеўшчынскай сельскай бібліятэкі.
На фота: выступленне народнага калектыву “Надзея” ў Бабініцкай сельскай бібліятэцы-клубе.
Фота з архіва Аршанскай ЦБС.