У цырымоніі адкрыцця прынялі ўдзел намеснік міністра культуры нашай краіны Аляксандр Яцко, міністр спорту і турызму Сяргей Кавальчук, намеснік старшыні Мінскага аблвыканкама Анатоль Ісачэнка і старшыня Народнага ўраду горада Чунцын КНР Тан Лянчжы.
У выставачнай зале галерэі адкрылася выстава кітайскага жывапісу, якая працягне сваю працу да 22 ліпеня. Чунцынская бібліятэка пазнаёміла гасцей мерапрыемства з кітайскімі выданнямі і тэхнікай кнігадрукавання, напісання іерогліфаў. Члены Кітайскай асацыяцыі мастакоў правялі майстар-класы для ўсіх ахвотных. Турыстычны патэнцыял Чунцына быў прадэманстраваны праз фотаздымкі краявідаў горада.
Як паведамілі ў галоўным ўпраўленні ідэалагічнай работы, культуры і па справах моладзі Мінскага аблвыканкама, падчас Дзён культуры адбыліся перамовы ўдзельнікаў кітайскай дэлегацыі з прадстаўнікамі Нацыянальнай бібліятэкі Беларусі, Нацыянальнага мастацкага музея, Нацыянальнай кінастудыі “Беларусьфільм”.
Замежныя госці наведалі індустрыяльны парк “Вялікі камень”, мемарыяльныя комплексы “Курган Славы” і “Хатынь”, Нацыянальны гісторыка-культурны музей-запаведнік “Нясвіж”, а таксама замкавы комплекс “Мір”. Дырэктар Чунцынскай бібліятэкі Жэнь Цзын перадаў Мінскай абласной бібліятэцы імя Аляксандра Пушкіна калекцыю кніг і дыскаў па гісторыі і культуры Чунцына.