На лагатыпе фэсту — лебедзь. Ён — сімвал сяброўства, сямейнай еднасці і творчасці. Гэтыя птушкі пастаянна прылятаюць сюды, дзе за мастком Бярэзіна з ручаіны пераўтвараецца ў невялікі вадаём, а потым вучыцца быць ракой. На беразе — амфітэатр, галоўная сцэна фэсту. Да святочнай мітусні лебедзі пакуль не прызвычаіліся. Але на ўсё выдае, што неўзабаве стануць яго “хэдлайнерамі”.
Падчас леташняга “Фестывалю дзвюх рэк” у Докшыцах.
Сёння фестываль вельмі арганічна спалучыўся з Днём горада. Докшыцам — 610 гадоў. Яны памятаюць ваяводу Войцеха Манівіду, удзельніка Грунвальдскай бітвы, які тут уладарыў. Пасля афіцыйных урачыстасцяў падчас конкурсу прыгажосці і грацыі будзе абрана лэдзі фестывалю.
Асноўныя фэставыя дзеі — агляд-конкурс сямейнай творчасці “Кірмаш талентаў” ды конкурс вакалістаў “Бярэзінскія напевы”. І слоган мерапрыемства — адпаведны: “Тут чысцейшыя крыніцы, дзе звонкіх песень льюцца галасы”. У госці прыедуць спевакі, што жывуць па берагах Бярэзіны ды Віліі. Будзе яшчэ пленэр юных мастакоў “Я малюю фестываль”. Адкрыецца “Салодкі фальварак” з нацыянальнай кухняй.
Пакрысе мерапрыемства становіцца самадастатковым. На арганізацыю і правядзенне сёлетняга “Фестывалю дзвюх рэк” мясцовы аддзел ідэалагічнай работы, культуры і па справах моладзі атрымаў грант ПРААН. Так, глядзіш, фэст і зробіцца міжнародным.