Калі летась, па прапанове маэстра Фінберга Гомельскі аблвыканкам, Чачэрскі райвыканкам і Гомельская абласная філармонія ладзілі першае свята, ініцыятыва Нацыянальнага канцэртнага аркестра дапамагла вызначыць яго звышзадачу: людзі ў пацярпелым ад наступстваў катастрофы на Чарнобыльскай АЭС раёне як ніхто іншы маюць патрэбу ў шчырай і адкрытай размове з прадстаўнікамі ўлады. Так нарадзіўся праект Асамблеі “Дыялог парламентарыяў Беларусі з актывам Чачэрскага раёна”.
Сёлета на такі нефармальны дыялог, што дапамагае вызначыць балючыя кропкі сацыяльна-эканамічнага жыцця раёна і абмеркаваць шляхі іх вырашэння, сабраліся члены Савета Рэспублікі Нацыянальнага сходу Рэспублікі Беларусь Таццяна Прыгожая, Уладзімір Дворнік, Аркадзь Кобрусеў, а таксама старшыня Гомельскага аблвыканкама Аляксандр Якабсон, дэпутат Палаты прадстаўнікоў Нацыянальнага сходу Рэспублікі Беларусь Наталля Аўдзеева і іншыя.
ІІ Свята беларускай музыкі — гэта і выстаўка работ творчай моладзі Чачэрскага раёна, і выступленні самадзейных калектываў Гомельшчыны, і гала-канцэрт Заслужанага калектыву Нацыянальнага канцэртнага аркестра Беларусі “Табе, Чачэрск, нашы песні” як фінальная кропка сустрэчы.
Палітра дваццацігадовай работы аркестра па эстэтычным выхаванні жыхароў краіны, у першую чаргу маладых гарадоў і вёсак, набывае новыя фарбы, адзначае маэстра Фінберг.
Добрая музыка і добрае слова даюць у спалучэнні такі зарад бадзёрасці людзям! А вырашэнне канкрэтных пытанняў, што ўзнімаюцца на сустрэчах, — падстава для аптымізму і надзеі.