На цырымоніі з прывітальным словам да ўдзельнікаў звярнуўся дырэктар Парку высокіх тэхналогій В.Цэпкала. Арганізатары праекта, адзначыў ён, перадусім ставілі на мэце папулярызацыю спадчыны нашай краіны.
Удзельнікам творчага спаборніцтва неабходна было вырашыць шэраг задач: садзейнічаць прапагандзе гісторыка-культурных каштоўнасцей Беларусі, развіццю трохмернага мадэлявання, рэканструкцыі страчаных помнікаў і іх аднаўленню. Дасягнутыя станоўчыя вынікі, на думку аўтараў праекта, прыцягнуць увагу спецыялістаў у галіне камп’ютэрных тэхналогій да стварэння электронных баз па тэматыцы культуры і мастацтва, дапамогуць у стварэнні адкрытага рэсурсу ў сетцы Інтэрнет па дадзенай тэматыцы.
Канкурсантам прапанавалася ўзяць аб’екты трох тыпаў складанасці: Мірскі замак, Сынкавіцкую царкву, ратушу ў Магілёве; Каложскую царкву, рэфарматарскі храм у Заслаўі; Белую Вежу, замкавую вежу, лямус манастыра брыгітак у Гродне.
Удзельнікі конкурсу паспяхова вырашылі пастаўленыя перад імі задачы. Першае месца ў конкурсе заняла Наталля Бязрукава, якая прадставіла найскладаную мадэль Мірскага замка. Другое месца — у Аляксандры Сямёнавай за выкананне мадэлі Сынкавіцкай царквы. А трэцяе месца падзялілі Даніла Рыбкін з мадэллю Магілёўскай ратушы і Аляксандр Фісенка, які стварыў камп’ютэрнае аблічча гродзенскай Каложскай царквы.
Н.К.