З расповедамі аб яго праграме, змесце і характары выступілі дырэктар фестывалю, начальнік аддзела культуры Акцябрскага райвыканкама Святлана Беразоўская, мастацкі кіраўнік і рэжысёр фестывалю, старшы навуковы супрацоўнік БелДІПК Мікола Козенка, іншыя спецыялісты лабараторыі традыцыйнага мастацтва.
Абмяркоўваліся як творчыя, так і арганізацыйныя пытанні.
Для тых, хто прывык да фармату мастацкай самадзейнасці, выканаць усе ўмовы гэтага фестывалю, прысвечанага традыцыйнай культуры, досыць складана. Няпросты фестываль “Берагіня” і з улікам таго, што калі на большасці аналагічных мерапрыемстваў праводзіцца конкурс па адным відзе мастацтва, дык на “Берагіні” — па розных. Удзельнікі павінны і пець, і танчыць, і валодаць майстэрствам народных апавядальнікаў — усё гэта павінна быць перанята ад носьбітаў традыцыйнай культуры. Яшчэ трэба быць у самаробным народным касцюме сваёй мясцовасці і валодаць адным ці, лепш, некалькімі відамі народнага дэкаратыўна-прыкладнога мастацтва.
Сёлетні V Рэспубліканскі фестываль “Берагіня” пройдзе з 19 па 22 чэрвеня — напярэдадні Купалля і гэтым разам пры падтрымцы ЮНЕСКО. У рамках фестывалю адбудзецца ІІІ Рэспубліканскі турнір дзіцячых і маладзёжных фальклорных калектываў па спевах, харэаграфіі, інструментальнай музыцы, выкананні народнай прозы, пляценні пояса, разьбе па дрэве, саломкапляценні, падрыхтоўцы выставакпрэзентацый. Пройдуць і V Рэспубліканскі турнір танцавальных пар — выканаўцаў народных побытавых танцаў, ІІ Рэспубліканскі турнір салістаў — выканаўцаў твораў народнай спадчыны.
У красавіку, таксама ў рамках Фестывалю фальклорнага мастацтва “Берагіня”, адбудзецца чарговая Рэспубліканская навукова-практычная канферэнцыя “Традыцыйная культура і дзеці. Праблемы этнавыхавання”. Аб цікавасці да тэмы сведчыць ужо тое, што больш чым 100 жадаючых прыняць удзел у канферэнцыі прыслалі ў БелДІПК свае даклады.
Наталля РУСАК