 |
“Шапэн для моладзі” з’яўляецца адным са шматлікіх шапэнаўскіх конкурсаў і фестываляў у Польшчы, між якімі існуюць наладжаныя сувязі. Так, членамі журы на гэтым конкурсе, які ахоплівае юных піяністаў да 18-ці гадоў, становіцца польская прафесура — былыя ўдзельнікі Міжнароднага конкурсу імя Ф.Шапэна ў Варшаве. Запрашаюцца ў журы і вядомыя замежныя музыканты. Паказчыкам прэстыжнасці конкурсу і яго надзвычай высокага ўзроўню з’яўляюцца абавязковыя для юных удзельнікаў творы Ф.Шапэна, якія складаюць канцэртны рэпертуар прафесійных выканаўцаў.
Праводзіцца конкурс у замку Радзівілаў у Антоніне. Некалі наведваў гэты замак і Шапэн. У тым пакоі, дзе ён іграў, зроблены музей. Там і цяпер захоўваецца раяль, да якога дакраналіся пальцы вялікага кампазітара і піяніста. Замак стаў не толькі гістарычным помнікам, але і адным з культурных цэнтраў па ўвекавечванні нацыянальнай спадчыны: у ім праводзяцца не толькі конкурсы, але і штогадовыя фестывалі шапэнаўскай музыкі з удзелам сусветна вядомых музыкантаў.
— Палякі, — расказала маці юнай пераможцы Вольга,— з вялікай пашанай ставяцца да свайго класіка і нават лічаць, што найбольш дасканала выконваць яго творы, разумеючы ў іх кожную нотку і ўсё тое, што закладзена творцам “паміж нотамі”, могуць толькі яго суайчыннікі. Таму на конкурсе “Шапэн для моладзі”, як і на падобных “дарослых” спаборніцтвах, надзвычай высокія мастацкія крытэрыі. Маша ўдзельнічала ў малодшай групе, дзе былі дзеці да 12-ці гадоў. У сярэдняй, да прыкладу, вызначылі толькі лаўрэата другой прэміі, не прысудзіўшы ні першай, ні трэцяй. У старэйшай жа — не аказалася ніводнага дыпламанта. Машу журы і крытыкі (а спаборніцтва шырока асвятлялася СМІ) назвалі “перлінай конкурсу”. На заключным канцэрце яе ажно тройчы выклікалі “на біс”! Мабыць, яшчэ і таму, што яна выконвала сярод іншых твораў Шапэна той яго Паланез, які быў прызначаны абавязковым для выканаўцаў не малодшай, а сярэдняй групы.
Надзея БУНЦЭВIЧ