Паводле традыцыі, фестываль працягнецца да канца мая і завершыцца разам з заканчэннем навучальнага года. Штотыднёвыя канцэрты, якія пройдуць на розных сцэнах, прадэманструюць дзейнасць усіх кафедр БДУКіМ. Адметнасцю сёлетняй “творча-навучальнай справаздачы” стане і тое, што, акрамя разнастайных канцэртаў і майскай выстаўкі “Арт-аб’ект” у мастацкай галерэі “Універсітэт культуры”, фестывальная праграма ахопіць таксама Дні факультэтаў. Упершыню ў галоўным корпусе навучальнай установы адбудуцца конкурс-канцэрт скрыпічнай джазавай імправізацыі, канцэрт камп’ютэрнай музыкі.
Такі шырокі размах свята набывае дзякуючы дзейнасці прадзюсерскага цэнтра “Арт-мажор”. Ён не толькі папулярызуе шматлікія калектывы сваёй навучальнай установы, але і арганізоўвае ды праводзіць разнастайныя шоу-праграмы, святы, конкурсы, фестывалі (“Арт-мажор” — адзін з іх) і г. д.
Пераканацца ж у тым, як многа ва Універсітэце культуры і мастацтваў студэнцкіх калектываў, можна было на гала-канцэрце адкрыцця.
Амаль ва ўсіх нумарах выкарыстоўваліся прыёмы інструментальнага тэатра. Практычна ўсе ансамблі і салісты выступалі разам з Маладзёжным эстрадна-сімфанічным аркестрам пад кіраўніцтвам Віктара Валатковіча, які дырыжыраваў папераменна з Анатолем Кудзіным. У выніку ўвесь канцэрт набыў імкліва-напорыстае, зычнае гучанне. На жаль, знаходжанне аркестра на сцэне падчас усяго канцэрта не дазволіла ўпрыгожыць відовішча яркімі, у тым ліку вырашанымі ў стылі фольк-мадэрн, сучаснымі танцавальнымі нумарамі, якіх багата ствараецца на кафедры харэаграфіі. Але, трэба спадзявацца, іх можна будзе ўбачыць на канцэрце кафедры ў красавіку.
Надзея БУНЦЭВІЧ
На здымку: на гала-канцэрце“Арт-мажору”.
Фота Канстанціна ДРОБАВА