У зале прадстаўлены матэрыялы з фондаў музея. Гэта лялькі, якія былі заняты ў спектаклях Беларускага дзяржаўнага тэатра лялек і абласных лялечных тэатраў (мастакі — Л.Герлаван, А.Фаміна, В.Рачкоўскі, М.Данько, А. і Г. Сідаравы), афішы і праграмы да спектакляў розных часоў, эскізы лялек мастакоў Л.Быкава, А.Вахрамеева. Экспануюцца і фатаграфіі сцэн да спектакляў “Дзед і жораў” В.Вольскага, “Сярэбраная табакерка” паводле З.Бядулі, “Па шчупаковай волі” Л.Тарахоўскай, “Іван-царэвіч і Шэры Воўк” А.Бычкова, “Тыграня Петрык” Х.Янушэўскай, “Балада пра белую вішню” С.Клімковіча, “Сымон-музыка” паводле Я.Коласа, “Чортаў млын” паводле Я.Дрды і інш.
Значнае месца займае паказ матэрыялаў Дзяржаўнага тэатра лялек Беларусі. Тэатр амаль за 70-гадовы тэрмін стаў школай майстэрства для акцёраў, казачным домам для дзяцей, стаў вядомым не толькі ў Беларусі, а і далёка за яе межамі.
Вопыт дзейнасці рэжысёраў — народнага артыста Беларусі Анатоля Ляляўскага і яго сына Аляксея Ляляўскага аказаўся бясцэнным для ўсіх лялечных тэатраў краіны. Тэатр праславілі мастакі Л.Быкаў і Б.Звінаградскі.
Юныя гледачы змогуць патрымаць лялькі ў руках, паразмаўляць з імі, паўдзельнічаць у спектаклях, якія будуць ладзіць навуковыя супрацоўнікі.
Валянціна ДРОЗД,
загадчык навукова-экспазіцыйнага
аддзела Дзяржаўнага музея гісторыі
тэатральнай і музычнай культуры