У Віцебску яны разам з Малевічам уваходзілі ў філасофска-навукова-даследчую экспедыцыю, дзе вялі працу па другім, супрэматычным аддзеле, заданнем якога былі пошукі руху супрэматычных формаў і стварэнне табліц з аналізам сіл пабудовы і ўспрымання, а таксама даследаванне колеру. Ілля Чашнік займаўся ў гэтым аддзеле-лабараторыі сістэмай дынамічных канструкцый пад назвай «УЭЛ». Казімір Малевіч перасцерагаў сваіх вучняў ад павярхоўнага стаўлення да супрэматызму, настойваў на тым, што гэта не асобныя прыёмы і нават не іх сукупнасць, сцвярджаў, што нельга ўспрымаць сістэму супрэматызму як спалучэнне геаметрычных плоскасцяў і формаў. Ад вучняў ён патрабаваў філасофскай глыбіні мыслення. І ў гэтым сэнсе ў дзейнасці вузкага кола УНОВІСа выдзяляюцца дзве паралелі: 1) укараненне супрэматызму ў асяродак і акупацыя асяродку супрэматызмам на ўзроўні дызайнерскіх распрацовак; 2) распрацоўка Малевічам супрэматычнага канона (выкладзенага ў ягонай віцебскай працы «Супрэматызм. 34 малюнкі») і варыянтаў супрэматычнага канона, прапанаваных ягонымі бліжэйшымі вучнямі.
У 1915-м 18-гадовы Мікалай Суэцін з’явіўся ў Віцебску, у канцы 1918-га — паступіў у Віцебскую народную мастацкую вучэльню, створаную Шагалам. Заняткі ў архітэктурнай майстэрні Лазара Лісіцкага праз год, калі ў ВНМВ пачаў выкладаць Малевіч, перараслі ў паралельныя штудыі. А ў лютым 1920-га Суэцін ужо сябра Тваркама УНОВІСа. Ілля Чашнік пасля нядоўгага знаходжання ў Другіх Дзяржаўных вольных мастацкіх майстэрнях у Маскве вярнуўся ў Віцебск, паступіў у ВНМВ, таксама займаўся ў майстэрні Лісіцкага, а потым стаў вучнем Малевіча. Малевіч для іх абодвух быў пунктам адліку — у мастацкай практыцы і ў мастацкім мысленні. Абодва яны тварылі ў рамках яго супрэматычнага канона.
Своеасаблівасць Суэціна была ў прыхільнасці да дыяганальных рухаў. У цэнтры ягоных кампазіцый існуе / рухаецца супрэматычнае цела / снарад (тэрмін В. Ракіціна), што разрывае прастору: хуткасць нібыта толькі пачынае набірацца, але дынамічнае імкненне ў работах Суэціна не пераходзіць у футурыстычнае мільганне і цэласнасці формы не парушае. Мікалай Суэцін не пераходзіў за грань пругкасці канона, не ўводзіў новыя структурныя складнікі, ён заўжды заставаўся ў памежнай вобласці. У яго заўсёды была найбольш моцная канцэнтрацыя дынамізму на плоскасці і пачатак развароту ў прастору. У кожнай з прац была заўважная гранічная пругкасць дынамічнай формы, трансфармацыя супрпрамой у супрдыяганаль, хорду, паўакружнасць. Плоскасці накладаліся, змяшчаліся і рухаліся адносна адна адной. Геаметрычныя формы ўзаемаператвараліся і вібравалі. Малюнак заўсёды заставаўся жорсткім і выразным.
З асноўных формаў плоскаснага супрэматызму Мікалай Суэцін актыўна выкарыстоўваў трохкутнік, а да колеравай супрэматычнай трыяды дадаваў зялёны. У аб’ёмным варыянце супрэматызму ён выкарыстоўваў куб і ягоныя варыяцыі: падоўжаныя прастакутнікі, выцягнутыя цыліндры, плоскія паралелаграмы.
Другі вучань Малевіча з блізкага кола, Ілля Чашнік, пераадольваючы жорсткую грань канона, дзейнічаў на мяжы з адваротнага боку.
Супрэматычныя кампазіцыі Чашніка валодалі безумоўным патэнцыялам канструкцый, асабліва гэта выяўлена ў яго супрэматычных рэльефах 1920-х. Ілля Чашнік, як і Мікалай Суэцін, імкнуўся да дынамікі і выкарыстоўваў для гэтага вертыкальныя пабудовы. Яго прыгожыя кампазіцыі з уключэннямі разнастайных адценняў колеру на палатне, аркушах і нават на фарфоры адрозніваліся выключным значэннем вертыкалі / стралы з гарызанталлю / проўнам.
Крыжападобныя, яны ўражвалі сваёй напружанай, брутальнай і адначасова імклівай, палётнай пабудовай — экспрэсіўныя, яскравыя, кідкія, ясныя, лаканічныя і выразныя. Даследчыкі падкрэсліваюць іх манументальнасць і першабытную простасць. У колеравую супрэматычную палітру Ілля Чашнік унёс высакародны і стрыманы шэры.
Кампазіцыі Чашніка найбольш выразна рухаліся ў бок канструктыўнасці. Гэта пацвярджаецца знакамітым чашнікаўскім праектам Трыбуны — канструктыўнай, але названай супрэматычнай.
А рэльефы Іллі Чашніка імкнуліся да архітэктуры. На аснове супрэматычнага канона ён ствараў і дасканалыя формы геаметрычнага арнаменту, таксама мадэляваў светлавыя рэкламы. Пры гэтым ужо на эскізах, як і ў саміх завершаных кампазіцыях, бачна, як палётна мысліць Чашнік, як імкнецца прэч ад паверхні зямлі, як узлятае ў свабодную прастору — у паветра ці ў беспаветранасць... Часопіс, што выдаваўся ў тым ліку і ў Віцебску, меў назву «АЭРО», і гэтае вызначэнне — разгорнутая метафара творчасці мастака.
Ілля Чашнік добра разумеў магчымасці супрэматычнага канона, сінкрэтызм ягонай жорсткай геаметрычнасці з патэнцыялам крэатыўнай свабоды.
У заліковай кніжцы Чашнік настойвае: «Той, хто ўступае ў вобласць супрэматычнай сістэмы, сустракаецца з абсалютна новымі адчуваннямі і станамі, у якіх асабістая ініцыятыва страшна развітая. <...> К. С. Малевіч <...> сваімі тэарэтычнымі і практычнымі працамі выявіў і абгрунтаваў усю сістэму. <...> Той, хто ўваходзіць у сістэму супрэматызму, ужо мае першапачатковае адчуванне беспрадметнасці, што з’яўляецца асновай супрэматызму. Першае палажэнне супрэматызму — праца над геаметрычна ясна выяўленымі формамі — прыводзіць да пачатку адчування супрэматызму і дынамічнага яго стану. <...> любое супрэматычнае палажэнне дае нам узбуджэнне супрэматычнага рытму». Далей Ілля Чашнік разглядаў наступны этап развіцця супрэматызму, а значыць, і магчымасці супрэматычнага канона (без выхаду за яго межы): «...Асноўныя вынікі працы ў гэтым перыядзе прыводзяць да паступовага канструявання некалькіх формаў, калі ў першапачатковым моманце яны выяўляліся толькі як аднолькавыя». Для Чашніка пры даследаванні далейшых перыядаў супрэматызму відавочны ягоны выхад у прастору: «Лічу гэты момант <...> самым асноўным, крыніцай усёй далейшай працы ў матэрыяльных праектах і найвышэйшым развіццём супрэматызму і свядомасці. <...> З’яўляецца момант працы над гэтым станам, які мае ўсе зародкі далейшага развіцця аб’ёмнага праекта».
Асаблівасць творчасці Суэціна і Чашніка — гэта выхад да мяжы супрэматычнага канона Малевіча, рух вакол гэтай мяжы пры захаванні асноўных параметраў і структуры. Калі Суэцін у працы з супрэматычным канонам выкарыстоўвае супркуб, то відавочна, што Чашнік засноўваецца на варыянце / раскладцы супрквадрата — супркрыжы і супркругі ў большай ступені на плоскасці.
У Ленінградзе абодва працавалі на Дзяржаўным фарфоравым заводзе. Ілля Чашнік падкрэсліваў, што ён мастак-кампазітар і выпрацоўвае кампазіцыйныя формы ў сваіх узорах па эскізах Малевіча і па ўласных. У 1925 годзе ў Парыжы на Міжнароднай выставе дэкаратыўнага мастацтва авангардны фарфор апынуўся ў цэнтры ўвагі, і Чашнік атрымаў шматлікія замовы. Міжнародныя прызы меў і Мікалай Суэцін, які стварыў свае формы супрэматычнага фарфору, і гэтыя ягоныя творы, што аб’ядноўвалі жорсткія і мяккія абрысы, мелі назву суэтоны. У 1932 годзе Суэцін стаў галоўным мастаком завода.
У малевічавым Дзяржаўным інстытуце мастацкай культуры (ГІНХУКу) абодва былі ў фармальна-тэарэтычным і практычным (жывапісным) аддзеле. У 1925 годзе Мікалай Суэцін узначаліў тут аддзел матэрыяльнай культуры. Усе аддзелы інстытута ставілі мэтай стварэнне ўніверсальнай мастацкай метадалогіі праз аналіз мастацтва, даследаванне заканамернасцяў форма- і структураўтварэння на базе Тэорыі прыбавачнага элементу Малевіча.
У канцы 1920-х Суэцін і Чашнік працавалі ў архітэктара Нікольскага, у майстэрні якога рабілі падбор колеру для гарадскога асяроддзя, калі ў прасторы на прынцыпах супрэматызму спалучаюцца формы школ, мастоў, стадыёнаў.
Лёс творцаў склаўся па-рознаму. Ілля Чашнік загінуў маладым ад перытаніту ў сакавіку 1929 года, і яго пахаванне таварышы трансфармавалі ў сапраўдную супрэматычную акцыю. Над труной размясцілі малюнак з чорным квадратам, над самім целам вілася стужка «Мастаку новага мастацтва», на магіле быў пастаўлены белы куб з чорным квадратам (праз шэсць гадоў падобны надмагільны манумент Суэцін паставіў над месцам пахавання Малевіча).
Мікалай Суэцін сярод новых, ленінградскіх вучняў Казіміра Малевіча да канца заставаўся ягоным самым блізкім і сапраўдным таварышам, іх звязвала духоўная роднасць і ўзаемная павага. Малевіч высока цаніў Суэціна, Суэцін жа цалкам заўсёды давяраў меркаванню Малевіча. Суэцін арганізаваў пахаванне Малевіча як інсталяцыю, з супрэматычнай труной і з праграмнымі аб’ектамі вакол. Ён зрабіў урну для астанкаў, аддаў Рускаму музею пасмяротную маску Малевіча і злепак ягонай рукі. Пасля сыходу настаўніка Мікалай Суэцін збіраў яго рукапісы і дзённікі, разбіраў і аналізаваў тэксты, напісаныя бісерным почыркам: «Вечарамі, калі ёсць час, чытаю. Надзвычайныя думкі». Падчас блакады Ленінграда ён заставаўся ў горадзе, з 1944 года быў галоўным мастаком Музея абароны Ленінграда. Памёр Мікалай Суэцін у студзені 1954 года.
У гісторыі УНОВІСа Ілля Чашнік і Мікалай Суэцін застаюцца найбольш паслядоўнымі вучнямі Казіміра Малевіча, якія праніклі ў сутнасць супрэматычнага метаду і поўнасцю рэалізавалі яго.
Таццяна КАТОВІЧ