Мастак уключаецца ў сістэму мыслення рэжысёра
На свой першы анімацыйны праект я патрапіла нечакана і са спазненнем: сяброўка, якая працавала ў гульнявым кіно на студыі «Беларусьфільм», распавяла пра рэжысёра, які шукае мастака. Я не ведала рэжысёра, не марыла пра анімацыю. У мяне ўсё было добра — мастацкая школа, вучні, майстэрня. Слухала яе і думала: пры чым тут я?
Адыграла сваю ролю выпадковая рэпліка: «Яму патрэбны мастак іранічны». Ну а далей усё развівалася імкліва: знаёмства з Ігарам Волчакам, які сваім абаяннем шматграннай асобы, ды яшчэ з гумарам, скарыў з першай гутаркі; задавальненне ад маёй вучаніцы, што ўжо працавала ў здымачнай групе; і мае эскізы, якія аказаліся неардынарным рашэннем. Якраз незадоўга да таго, працуючы з дзецьмі, падумала: як бы гэта самой маляваць кожны дзень? Вось ужо бойся сваіх жаданняў! У нашым першым фільме «Ронда-капрычыёза» (2014) мне давялося маляваць цэлымі днямі i без выхадных — праект быў «падпаленым». Было нервова і не без канфліктаў, але цяпер успамінаю вялікае, велізарнае задавальненне, калі прыдумляла нешта новае і чула ад хлопцаў-камп’ютаршчыкаў падганяльнае: «О, які свежы матэрыял!» Так нараджаўся гэты фільм — у каманднай, ненармаванай, складанай абстаноўцы, калі ў цябе з рук забіраюць яшчэ не здзейсненае і «не такое», аддаюць у працу і — о цуд! — твае героі пачынаюць рухацца і жыць сваім жыццём.
«Ронда-капрычыёза» можна назваць паспяховым: ён атрымаў некалькі прызоў на нацыянальных і міжнародных фестывалях. Адной з самых прыемных адзнак стаў паказ фільма ў праграме «Лепшая анімацыя свету» на фестывалі ў Хірасіме (Японія, 2014). За час працы на кінастудыі мне давялося бачыць шмат анімацыйных стужак розных школ, у тым ліку і самых наватарскіх, фестывальных. Мяркую, у нашым фільме аўтарытэтнае японскае журы ацаніла ў тым ліку «ручную працу»: у нас не было ніякіх камп’ютарных «залівак» і эфектаў, хоць апрацоўка шматслойнага малюнка была вельмі складанай. І гэта яшчэ адзін рэверанс хлопцам з камп’ютарнага цэха, сапраўдным фанатам сваёй справы. Фільм наш мы, тыя, хто над ім працаваў, палюбілі. І гледачы таксама прымаюць яго — за гэтым я назіраю ўжо некалькі гадоў.
Кажу тут толькі пра выяўленчы бок, пра тое, за што ў адказе мастак-пастаноўшчык. Галоўны чалавек у праекце, безумоўна, рэжысёр. Гэта чалавек-аркестр, які можа сабраць разам малюнак і гук, які знаходзіць і звязвае ўсіх, хто ажыццяўляе яго задуму. У «Ронда-капрычыёза» Ігар Волчак — аўтар яшчэ і выдатных музычных тэм.
Пазней мы зрабілі дзве сумесныя анімацыйныя стужкі: «Дурная пані і разумны пан» (2015) і «Ваўчышка» (2018). Пагаджаючыся на новы праект, я спачатку вельмі хацела выкарыстоўваць дасягненні папярэдніх работ. Маю на ўвазе тэхналогію апрацоўкі малюнка. Але Ігар Віктаравіч далікатна прапаноўваў мне паспрабаваць новы матэрыял. Напрыклад, у пачатку работы над другім фільмам паказаў мне сцёрты — да трох валасін — пэндзлік і кажа: «А можа, гэтым паспрабуеце?» У выніку фільм быў намаляваны чорнай тушшу, жывымі рванымі лініямі. А «Ваўчышка» нараджаўся ў «вугальнай шахце», як казаў Ігар Віктаравіч. Дакладней, я малявала «чорным соусам», а каляровыя часткі фільма — пастэллю, якую да таго не разумела і не любіла. Так, гэта адмысловая задача — знайсці кантакт з матэрыялам.
Яшчэ пра адзін аспект працы ў анімацыі, непраграмны. Калі стомішся да вечара ці дзень склаўся не такі, адводзіш душу, малюючы герояў у якой-небудзь смешнай або кранальнай сітуацыі. Некалькі разоў гэтым маім вольнасцям давялося-такі трапіць у фільм. Так, у «Ваўчышку» каўбаса вісіць на цвічку, на сцяне — такое вось хуліганства. Пра кінастудыю магу шмат расказваць. Цяжка было, але тых, з кім давялося працаваць, шчыра люблю.
У анімацыі ўсё павінна быць жывое
Спецыфіка працы мастака ў анімацыі ў тым, што гэта як быццам паралельная гісторыя. Самы цікавы перыяд для мяне — падрыхтоўчы, у пачатку фільма. Калі яшчэ няма групы, толькі мастак і рэжысёр. У гэты час — калі робяцца стылістычныя эскізы і персанажы, вырашаецца, якім матэрыялам маляваць, — Ігар Віктаравіч амаль не абмяжоўваў. Усе тры нашы фільмы зроблены ў абсалютна розных графічных тэхніках.
Важна сябе настроіць, што створаныя табой персанажы і фоны будуць у руху. А статычны малюначак, табой задуманы, часта страчвае вывераную фармальную кампазіцыю. І ты перажываеш, вядома, твой унутраны Эйзенштэйн незадаволены. Я асабіста разумею, што траекторыя руху — гэта таксама кампазіцыя, але гэта ўжо не ў маёй уладзе, бо заданне аніматарам дае рэжысёр.
І перад гэтым ты ўжо нейкі час не выключаны: пра што б ні думаў, што б ні бачыў, днём і ноччу ў тваёй галаве ідзе праца. Патрэбна «назапасіць» карцінкі, якія натхняюць, у тэлефоне, яны могуць быць зусім з іншай оперы, але нешта табе падказваюць, нейкі ход, стан ці каларыт. А калі пачынаеш маляваць, ты ўжо нікуды не глядзіш, усё ў тваёй галаве. Невымоўнае задавальненне — прыдумляць цэлы свет.
Другое — гэта гумар, якім мне хочацца кожны вобраз узнагародзіць. Без яго не ўяўляю анімацыю. Без яго не зрабіць вобраз жывым ці кранальным, пра сур’ёзнае без гумару таксама не скажаш! У сваіх станковых работах пра гэта я зусім не думаю і лічу недарэчным.
Усе тры фільмы, над якімі мне давялося працаваць, зроблены ў тэхналогіі камп’ютарнай перакладкі. Не буду, калі можна, казаць пра 3D-анімацыю і маё да яе стаўленне. Але трохі распавяду, чым перакладка адрозніваецца ад маляванага кіно, якое ўсе мы любім. Дык вось, перакладка дазваляе «парэзаць на кавалачкі» і рухаць у камп’ютарнай праграме аўтарскі малюнак, з усімі яго нюансамі і рыскамі.
У класічнай перакладцы здымае на спецыяльным станку пад камерай гуру анімацыі Юрый Нарштэйн. На некалькіх пластах шкла выкладваюцца дэкарацыі і персанажы, узнікае глыбіня і складанасць прасторы. Вобразы прапрацоўваюцца і рэжуцца на часткі, нейкія — на мноства дробных дэталяў. Напрыклад, лапка з васьмі частак, маленечкія вочкі і раток... Па аповедах ведаю, як складана ўсё гэта мацаваць і не страціць. Аднак затое цудоўныя малюнкі Франчэскі Ярбусавай захавалі ўсю прыгажосць і мастацкасць. Камп’ютарная перакладка спрасціла тэхналагічны працэс, на шчасце ці на жаль. Лічбавыя эфекты замест вазеліну, змякчаючы планы, часам таксама спраўляюцца з задачай глыбіні кадра. Але мы намагаліся туманы і цені зрабіць ручнымі фактурамі — гэтак больш жыцця.
Пружаны: вярнуцца да дзіцячай душы немагчыма
Маё дзяцінства прайшло ў Пружанах, да 14 гадоў. Потым я з’ехала ў Мінск, паступіла ў мастацкую вучэльню. Школу я не вельмі любіла, хоць была выдатніцай. Яна была для мяне беспаветранай прасторай. Тады ў Пружанах не было ні студыі, ні мастацкай школы, дзе можна было б вучыцца выяўленчаму мастацтву. Прыязджалі настаўнікі (раней такое практыкавалася) са школы-інтэрната імя Ахрэмчыка з Мінска, мяне адабралі, але ў той год памёр мой бацька і мама мяне не адпусціла. У вучэльню, у Глебаўку, я патрапіла, як кажуць, быццам рыба ў сваю ваду. Шчаслівыя гады!
Але цяпер пра Пружаны: некалькі гадоў ездзіла дапамагаць маме, а сяброў ужо амаль не было. Сяброўкі з’ехалі: адна ў Маскву, іншая на Поўнач, а ў Пружанах заставалася строгая мама і «што людзі скажуць». Пра які жывапіс можна было думаць? Толькі лічаныя разы я брала з сабой фарбы!
Паўтара года таму мы забралі маму ў Мінск, і вось гэтым летам я наведала пустую кватэру і пабачылася з сяброўкай, якая прыехала ў адпачынак. У гэты час — так супала — у Пружанах была яшчэ адна мая сяброўка — мастачка Ніна Чураба з Гродна. Яна ўдзельнічала ў пленэры імя Станіслава Жукоўскага, аднаго з маіх любімых жывапісцаў. А пленэр праходзіць ужо ў пяты раз! Так мне давялося пазнаёміцца з яго арганізатарамі Святланай і Іосіфам Машкаламі. Яны купілі цудоўны стары дом, прама насупраць нашага, зрабілі там галерэю і ствараюць цёплае, творчае асяроддзе, запрашаючы жывапісцаў з бліжэйшых месцаў Беларусі, а таксама з Масквы і з Пецярбурга. Цяпер ужо сабраная нядрэнная калекцыя карцін. Праўда, раённыя ўлады пакуль ніяк іх не падтрымліваюць, і гэта шкада.
Пазнаёміліся мы і з дырэктарам музея «Пружанскі палацык» Юрыем Зялевічам і яго жонкай Аленай, журналісткай мясцовай газеты. Дзякуючы гэтым цудоўным людзям мне ўдалося адчуць і пранікнуцца прыгажосцю краю майго дзяцінства. Мяне папрасілі правесці творчую сустрэчу з паказам анімацыйных фільмаў, якая прайшла ў дзівоснай атмасферы, з экранам на фоне заходняга неба. Нарэшце пачало ажыццяўляцца маё даўняе жаданне — падзяліцца з землякамі тым, што ўдалося зрабіць.
Мы шмат падарожнічалі па наваколлі, паглядзелі разбураныя сядзібы мясцовай шляхты, якой было нямала. Гэта сумна і незвычайна прыгожа нават у руінах. Але самае моцнае і нават трагічнае ўражанне было ад наведвання дома маіх бабулі і дзядулі. Дом даўно не наш, гаспадары там таксама не жывуць. А ў двары вырасла высачэзная дзядулева елка з вялізнымі лапамі галін... І жывыя адрынкі дзядулевы, грушы, нават бабуліны клубніцы на тым самым месцы. Так прыгожа было і так балюча...
Цяпер, пасля паездкі, каларыты, адкрытыя зноўку, не даюць мне спакою. Спадзяюся, у бліжэйшы час новая тэма з’явіцца ў маіх карцінах.
З вышыні цяперашняга вопыту ты бачыш гэтыя месцы, бачыш у цэлым кампазіцыю твайго жыцця. Вобразы дзяцінства заўсёды ўзнікалі, яны важныя і сілкуюць цябе. Аднак ты не знойдзеш іх там, калі вернешся. Ты ж вернешся на магілы продкаў, там ужо больш болю, чым іншых пачуццяў, патрэбных для жыцця. Таму ні пра якое вяртанне гаворкі быць не можа — гэта толькі ідэальнае ўяўленне, што можна вярнуцца, каб рэалізаваць тое, чым ты напоўнены. У большай ступені гэта ідэя вяртання тваёй дзіцячай душы ў свет, які там быў, але цяпер, у рэальнасці, яго ўжо няма! Як няма і зацікаўленага асяроддзя, моладзі, якая б ведала, што тут адбываецца нешта важнае.
У вучобе павінен быў памерці дылетант і нарадзіцца мастак
Напэўна, я магла б сказаць, што настаўнікамі ў маім жыцці былі ўсе — я маю на ўвазе педагогаў, саму атмасферу вучэльні. Па-чалавечы гэта былі вельмі добрыя людзі, і яны сталі значнымі для мяне. І сапраўды людзі мастацтва, хоць, можа быць, не сталі выбітнымі мастакамі. Асноўная вучоба была ўжо ў інстытуце, на кафедры манументальна-дэкаратыўнага мастацтва. Гаўрыла Вашчанка, загадчык кафедры, падтрымліваў мяне літаральна як бацька.
Гэта было пакаленне выдатных мастакоў, з вялікім жыццёвым вопытам, вялікай чалавечай высакароднасцю. Светлая ім памяць! Галоўным сваім настаўнікам лічу Уладзіміра Стальмашонка, які быў нашым куратарам чатыры гады. Яго метад выкладання вельмі адрозніваўся ад акадэмічнага. У першыя ж дні другога курса ён прыйшоў да нас са словамі: «Я буду вам перашкаджаць!» Мы рабілі вельмі шмат накідаў, потым, разбіраючы іх, Уладзімір Іванавіч вучыў нас думаць, развіваў творчае мысленне і насамрэч даў нам моцны старт.
І, вядома, Алег Хадыка — гэта асобная тэма. Думаю, сёння студэнтам не хапае такога чалавека — з яго глыбокай адукаванасцю ва ўсіх сферах, патрэбных мастаку. Можа быць, яго сістэма была для кагосьці складанай, але калі адны паспявалі засвоіць яе адразу, то другія працягвалі працаваць, ісці дарогай даследаванняў яшчэ доўгія гады. Нам трэба было памерці дылетантамі і нарадзіцца мастакамі. А гэта балючы працэс.
Пасля інстытута я вярнулася ў Глебаўку ў якасці педагога. У вучэльні 1980—90-х былі ідэальныя атмасфера для творчасці і адносіны паміж выкладчыкамі і студэнтамі. Мае педагогі сталі калегамі. Нават калі ўзнікалі спрэчкі ў настаўніцкай або на праглядах, усе па-добраму адно да аднаго ставіліся.
Тады ў вучылішчы выкладалі Ігар Цішын, Наташа Залозная, Ала Блізнюк, таксама вучні Хадыкі. Мне было цікава, якія задачы яны ставілі вучням. Гэта была новая школа, мы адно аднаго разумелі і сябравалі. Вучэльня тады проста кіпела, студэнты і мы заставаліся пасля заняткаў, рыхтавалі нейкія выставы, акцыі, спектаклі. Цяпер, успамінаючы тыя гады, многія сыходзяцца ў меркаванні, што гэта быў залаты час.
Не навязваць, а падладзіцца
Падказаць вучням магчымы шлях развіцця, дапамагчы ўсвядоміць неўсвядомленае, падзяліцца формуламі, якія забяспечаць падмурак, — гэта непарушны каркас, ад яго можна сыходзіць і вяртацца. Прафесійная база, што дапаможа не кідацца ў бакі, а эксперыментаваць. Праца ў мастацкай школе раскрыла для мяне вельмі важныя рэчы. Перадусім ні ў якім разе не прыніжаць асобу дзіцяці, занятага мастацкай творчасцю. Ніякіх кепскіх адзнак за вынік, толькі заахвочванне. Заўсёды знойдуцца словы і метады ў добрага педагога, каб падтрымаць вучня, каб крылцы падраслі. Гэта ні з чым не параўнальнае пачуццё, калі кажаш «малайчына!» аднаму, другому, трэцяму і бачыш, як гэта працуе на ўвесь калектыў дзяцей. Як кожны імкнецца дасягнуць вяршыні. І агульны вынік неверагодны! Прычым дзеці захоўваюць свае непадобнасці! Гэта цалкам шчаслівыя моманты.
Дзеці ў мастацкай школе занадта малыя, каб засвоіць твае веды раз і назаўжды. А потым яны, як правіла, трапляюць да іншых педагогаў і часта ад дасягненняў не застаецца і следу. Так вучышся шанаваць «тут і цяпер», калі атрымліваецца і ёсць кантакт вучня і настаўніка. Узнікае такі неверагодны ўздым, які і фіксуецца ў памяці, застаецца ў табе. Спадзяюся, гэта ёсць і ў маіх калег. Такі вось сэнс працы настаўніка. Яшчэ я часта лаўлю сябе на тым, што ўяўляю паспяховую будучыню дзіцяці. І як можна дазваляць сабе паблажлівасць або дэспатычнасць, калі справа толькі ва ўзросце, у часе?
Прыгадаўся эпізод. Я вяла ўрок па гісторыі мастацтва, тэма — жывапіс Англіі, XVIII стагоддзе. І адна дзяўчынка пытаецца: «Скажыце, а цяпер можна купіць Рэйнальдса?» «Ведаеш, — кажу, — вось вырасцеш, станеш паспяховай, адукаванай бізнэс-лэдзі і аднойчы скажаш мужу: “Дарагі, а ці не купіць нам Рэйнальдса?”» Трэба было бачыць гэтую дзяўчынку — выраўнялася спінка, выправа стала проста царскай, у поглядзе з’явілася такая годнасць!
Цікава, як пасля прыходу да гэтага разумення і шчасця жыццё падае новы паварот падзей. Улетку 2013 года ў школьны адпачынак выпадак прывёў мяне на кінастудыю.
Лепшае атрымліваецца гуляючы, але не выпадкова
Пра самае галоўнае распавесці складана... Калі ў двух словах, то, напэўна, колер як патрэба. Я ўвесь час пра яго думаю. Ён як музыка ў маёй галаве, днём і ноччу. Па сутнасці, я — абстракцыяністка: пляма здольная ўтрымліваць такую колькасць інфармацыі, што ператвараць яе ў форму часам здаецца празмерным. Да працэсу працы заўсёды стаўлюся як да эксперыменту, і я не ўпэўненая, што ў мяне ў выніку атрымаецца... Люблю рабіць невялікія работы на безадказным матэрыяле — паперы, кардоне. Люблю фарбы, якія сохнуць хутка: іх можна тут жа перакрыць, зрабіць складаныя пласты або адвесці ў іншы каларыт. Самае лепшае для мяне тое, што атрымліваецца выпадкова, гуляючы, раптам. Потым адсунешся і бачыш: выпадковае не выпадкова — там закладзена тое, што перажываеш.
Раней свае абстрактныя працы я называла шыфроўкамі, цяпер, напэўна, гэтак жа незразумела выказваю думкі.
Я прафесіянал, але думаць праектамі — гэта не маё. Я не нашу свае працы ў галерэі. І амаль не паказваю ў інтэрнэце. Спадзяюся, гэта часовае самаадчуванне, і яно выправіцца. Вельмі люблю многіх сваіх калег і сяброў-мастакоў, але яны ж свае працы паказваюць свету. Добра, што не ўсе мастакі такія падпольшчыкі!