З той жа — чалавечай — прычыны гэта й не атрымалася: люблю тэатральныя праграмкі. У «шлюбнай» напісана: «Лёс мужчыны, які знаходзіцца ў палоне чужых рашэнняў». Значыць, буду спачуваць герою, палон — гэта не жарты, чым больш чужых рашэнняў, множны лік, без Маці й Нявесты, галоўных жанчын, не абышлося. І далей: «Матчына любоў, якая паглынае сына і паралізуе яго асобу». Сапраўды жахліва. Ну, гэта Карняг, майстар вусцішнай прыгажосці, усё як мы любім.
Візуальна, як заўсёды ў тандэма Карняг-Нерсісян, неверагодная прыгажосць. Святло ў гэтым спектаклі — паўнавартасны актар. Яно аддзяляе свет жывых ад свету памерлых (сірочая песня), адначасова, як гэта ні парадаксальна, злучаючы іх; акцэнтуе ўвагу, выяўляе галоўнае, хаваючы ў змрок «непажаданае»; асляпляе, асвятляе — верхаводзіць. І спявае — нароўні з астатнімі двума кітамі свету гэтай пастаноўкі — музыкай і мовай, складаназлучанае пластыкай і драмай.
Пачынае спектакль вяснянка (веснавая песня з каляндарна-абрадавага свята «Гуканне вясны») «Вол бушуе — вясну чуе», дзе спачатку «дзеўка плача — замуж хоча», потым атрымлівае мудрае, гаркавае папярэджанне-прароцтва: «Не плач, дзеўка, пойдзеш замуж — нажывешся», а напрыканцы ўжо «дзеўка плача, сына меўшы». Спрадвечнае кола жыцця, нават каляіна, з якой так проста не выберашся, нават ведаючы, што цябе чакае. Такім чынам, Нявеста (Ганна Семяняка), адзіны персанаж ва ўсім белым, чакае замуства, смакуе яго наперад, рыхтуецца, нягледзячы на адкрытую непрыязь з боку свекрыві. А як іначай — так было да яе, так жа й будзе пасля. Апяклі эпізоды з бацькамі Нявесты: кранальнае развітанне з маці (Галіна Чарнабаева), якая аддае дачку і, па сутнасці, застаецца адна, і прага блаславення ад бацькі... з таго свету. Сірочыя вясельныя песні магутныя па сіле ўздзеяння, нібы працінаюць кожную клетачку цела, нат, як сказалі б астролагі ды сутаварышы, тонкага, бо й маюць на мэце, апроч старажытна-сакральнага (просьба дазволу на шлюб), яшчэ й благанне літасці ад новай сям’і-радзіны, куды ўваходзіць дзяўчына: «Устань, устань, а мой татачка, досыць спаць! // Ды памажы мне дружыначку назбіраць» — «Ой, я не ўстану, маё дзіцятка. // Зялён дзярночак залажыў грудцы, // Жоўты пясочак засыпаў вочы, // Нямыя дошкі сціснулі ножкі».
Акцёры плённа папрацавалі над вакалам, іх спевы — і а капэла, і з аранжыроўкамі (Каця Аверкава), і ў перапеўках ды шматгалосіі — кранаюць і пераконваюць.
Вернемся да праблемы, акрэсленай аўтарамі. Дык хто тут пакутуе, паланёны? Ясная справа, усе, бо людзі, але канкрэтней: Жаніх (Арцём Курэнь), якога «прымушаюць выбіраць» між Маці (Таццяна Мархель) й Нявестай, пазбаўляючы ўласнага голасу, сваіх жаданняў і нават больш — іх усведамлення? Нявеста, бо, убачыўшы, што рэальнасць жорсткая, прынамсі як адбітак у крывым люстэрку, і насамрэч ані абароны, ані надзейнага пляча падтрымкі дзяўчына не займее, а то й будзе вымушаная ўсперці ўсё на свае плечы, да ўсяго яшчэ і не ў змове адмовіцца ад такога шлюбнага шчасця — бо што-людзі-скажуць, цярпі-жанчына, так-трэба, усё-як-ва-ўсіх? А мо Маці, якая, паклаўшы жыццё на гадаванне сына, цяпер застаецца з чорнай пустэчай, што зеўрае ўсярэдзіне? Пошукі ахвяры ідуць у непарыўнай звязцы з пошукам вінаватага: адно немагчымае без другога. Дык хто тут хто? І... ці так ужо конча трэба іх адшукаць або, як гэта часта робіцца, прызначыць? Кожны варты спачування, як і кожны адказвае за свае ўчынкі. Самастойна, без ківання на іншага, ці тое чалавек, ці абставіны.
Датычна дэманізацыі (любові) Маці й яе ролі ў сынавым лёсе: ані з таго, што я ўбачыла, як і з таго, што дадалося-дамыслілася цягам спектакля ды развагамі пасля яго, не магу зрабіць такіх высноў. Гэта, бадай, той ілюстрацыйны хайдэгераўскі выпадак, калі мова гаворыць намі. Пры ўсёй веры да анатацыі спектакля, мне не тое што не шкада Жаніха, а неяк нават і спачуванне не праклёўваецца, нягледзячы на яго сапраўды часам кранальную разгубленасць і пацешную нягегласць. Я бачу Жаніха не як асобу, «пазбаўленую ўласнае волі», а як чалавека, які не хоча прымаць рашэнні (гойсанне па стале між мамай і жонкай як пакутлівы выбар між «усім гатовым» і жаданнем самасцвердзіцца, пакіраваць, «быць мужчынам» паводле сацыяльнай мадэлі, у рэшце рэшт). Яшчэ варта дадаць: ягоныя паводзіны не дадаюць дабра і маці. Я бачу Нявесту як падманутую дзяўчыну, якой замест яблыка ўручылі васковы муляж і абураюцца, маўляў, чаму не ясі? чаму не дзякуеш? (Двойчы яна спрабавала вырвацца з гэтага замкнёнага кола — двойчы ёй заступалі дарогу: спачатку грамадства, тыя самыя «людзі» з суполкі «што-людзі-скажуць», з птушкамі-тэлефонамі ў руках ды з драпежнымі вочкамі-агеньчыкамі камер, затым — вецер.) Адчай і нянавісць — нібы галоўныя пачуцці дзвюх вядучых гераінь, Нявесты і Маці жаніха. Дык што, вінавацім «паралізоўную» матчыну любоў?.. Альбо тут гаворка пра нешта іншае, тое, што мы звыкла — хапаем з паверхні ад ляноты, нежадання думаць-паглыбляцца? — называем любоўю.
Колерава «Шлюб» чорна-белы, але маецца і «чырвоная сцэна», эмацыйна цяжкая, якую распачынае купальская песня з рэфрэнам: «Адна сучка падласа. // Гэта, хлопцы, вам на мяса». Дзяўчына (Гражына Быкава), сляпым выпадкам выбраная сярод дзяўчат «на мяса», уваходзіць на стол-язык, цяпер падсвечаны так, што выдае на сляпучую лямпу ў лабараторыі, зверху, як з жахлівага сну, апускаецца стол-столь, пазбаўляючы нават магчымасці ўцёкаў. Адзін хлопец напаўняе келіх чырвоным віном, яно ліецца цераз край, залівае белую паверхню, іншыя падыходзяць з чаўнамі й разганяюць віно ў бок дзяўчыны, прымушаючы тую нервова і роспачна ўздрыгваць. Потым, як нічога ніякага, хлопцы зноў апранаюць кашулі й пінжакі, а астатнія жанчыны хапатліва і спрактыкавана прыбіраюць стол, змываючы віно-кроў, маўляў, было і было, што ўжо. Будзённасць гвалту — ці ёсць нешта больш вусцішнае за яе? «Ну, гэта не я, цяпер гэта не я...» Ты, мілая, твая маці, сястра, дачка. І раней, і цяпер, і потым. Жорстка? Несправядліва? Традыцыя, завядзёнка, жыццё. «Традыцыйная» жорсткасць пераплятаецца з «традыцыйнай» жа наканаванасцю й пакорай так шчыльна і так шчыра, ажно перыядычна не даеш веры, што гэтак адбываецца ў нашым жыцці. А яно адбываецца, і нат калі «маўклівыя сузіральнікі» не ўхваляюць гэтага, дык жа й не замінаюць.
Што такое тут вецер? Магутная сляпая стыхія? Наканаванне? Лёс, бог, лад жыцця? У абраных для пастаноўкі народных песнях да яго па дапамогу звяртаецца Нявеста ў сірочай песні («Уздыміцеся, буйныя ветры»); менавіта ён, вецер, уласна «расплятае касіцу» згвалтаванай дзяўчыне, і ў калыханцы сыночку замінае спаць таксама ён... Здаецца мне, гэтае пытанне лепей пакінуць без адказу, прынамсі агучанага; пакінуць яго сабе.
«Ці ёсць жыццё пасля спектакляў Карняга?» — выдыхнула мая сяброўка, калі мы выйшлі з тэатра ў мінскую снежаньскую ноч. А я думала пра тое, што традыцыі ствараюць людзі, што няма чалавека, які быў бы як выспа, і што кропля точыць камень не сілай.
Такім чынам, ідучы на спектакль, я імкнулася быць настолькі аб’ектыўнай (чытай: «чыстым аркушам успрымання»), наколькі гэта ўвогуле магчыма для чалавечай істоты. З той жа — чалавечай — прычыны гэта й не атрымалася: люблю тэатральныя праграмкі. У «шлюбнай» напісана: «Лёс мужчыны, які знаходзіцца ў палоне чужых рашэнняў». Значыць, буду спачуваць герою, палон — гэта не жарты, чым больш чужых рашэнняў, множны лік, без Маці й Нявесты, галоўных жанчын, не абышлося. І далей: «Матчына любоў, якая паглынае сына і паралізуе яго асобу». Сапраўды жахліва. Ну, гэта Карняг, майстар вусцішнай прыгажосці, усё як мы любім.
Бадай усю сцэнічную прастору займае стол — доўгі, вялікі, чорны. Аснова вяселля, яго нязменны атрыбут. Над сталом — таксама стол, толькі белы, ён жа экран-адбітак, такі сабе іншасветны пярэварацень; на яго праецыруюцца здымкі відэакамеры ў рэальным часе, толькі паспявай сачыць: тут кожная дэталь на сваім месцы ды са сваёй роляй. Дарэчы будзе згадаць неверагодную тэхнічную дакладнасць акцёрскай дый увогуле тэатральнай каманды — на сцэне безліч дратоў, шнуроў, правадоў ды іншай сучаснай трасцы, але механізм супрацы людзей і тэхнікі бездакорны!
Візуальна, як заўсёды ў тандэма Карняг-Нерсісян, неверагодная прыгажосць. Святло ў гэтым спектаклі — паўнавартасны актар. Яно аддзяляе свет жывых ад свету памерлых (сірочая песня), адначасова, як гэта ні парадаксальна, злучаючы іх; акцэнтуе ўвагу, выяўляе галоўнае, хаваючы ў змрок «непажаданае»; асляпляе, асвятляе — верхаводзіць. І спявае — нароўні з астатнімі двума кітамі свету гэтай пастаноўкі — музыкай і мовай, складаназлучанае пластыкай і драмай.
Пачынае спектакль вяснянка (веснавая песня з каляндарна-абрадавага свята «Гуканне вясны») «Вол бушуе — вясну чуе», дзе спачатку «дзеўка плача — замуж хоча», потым атрымлівае мудрае, гаркавае папярэджанне-прароцтва: «Не плач, дзеўка, пойдзеш замуж — нажывешся», а напрыканцы ўжо «дзеўка плача, сына меўшы». Спрадвечнае кола жыцця, нават каляіна, з якой так проста не выберашся, нават ведаючы, што цябе чакае. Такім чынам, Нявеста (Ганна Семяняка), адзіны персанаж ва ўсім белым, чакае замуства, смакуе яго наперад, рыхтуецца, нягледзячы на адкрытую непрыязь з боку свекрыві. А як іначай — так было да яе, так жа й будзе пасля. Апяклі эпізоды з бацькамі Нявесты: кранальнае развітанне з маці (Галіна Чарнабаева), якая аддае дачку і, па сутнасці, застаецца адна, і прага блаславення ад бацькі... з таго свету. Сірочыя вясельныя песні магутныя па сіле ўздзеяння, нібы працінаюць кожную клетачку цела, нат, як сказалі б астролагі ды сутаварышы, тонкага, бо й маюць на мэце, апроч старажытна-сакральнага (просьба дазволу на шлюб), яшчэ й благанне літасці ад новай сям’і-радзіны, куды ўваходзіць дзяўчына: «Устань, устань, а мой татачка, досыць спаць! // Ды памажы мне дружыначку назбіраць» — «Ой, я не ўстану, маё дзіцятка. // Зялён дзярночак залажыў грудцы, // Жоўты пясочак засыпаў вочы, // Нямыя дошкі сціснулі ножкі».
Акцёры плённа папрацавалі над вакалам, іх спевы — і а капэла, і з аранжыроўкамі (Каця Аверкава), і ў перапеўках ды шматгалосіі — кранаюць і пераконваюць.
Вернемся да праблемы, акрэсленай аўтарамі. Дык хто тут пакутуе, паланёны? Ясная справа, усе, бо людзі, але канкрэтней: Жаніх (Арцём Курэнь), якога «прымушаюць выбіраць» між Маці (Таццяна Мархель) й Нявестай, пазбаўляючы ўласнага голасу, сваіх жаданняў і нават больш — іх усведамлення? Нявеста, бо, убачыўшы, што рэальнасць жорсткая, прынамсі як адбітак у крывым люстэрку, і насамрэч ані абароны, ані надзейнага пляча падтрымкі дзяўчына не займее, а то й будзе вымушаная ўсперці ўсё на свае плечы, да ўсяго яшчэ і не ў змове адмовіцца ад такога шлюбнага шчасця — бо што-людзі-скажуць, цярпі-жанчына, так-трэба, усё-як-ва-ўсіх? А мо Маці, якая, паклаўшы жыццё на гадаванне сына, цяпер застаецца з чорнай пустэчай, што зеўрае ўсярэдзіне? Пошукі ахвяры ідуць у непарыўнай звязцы з пошукам вінаватага: адно немагчымае без другога. Дык хто тут хто? І... ці так ужо конча трэба іх адшукаць або, як гэта часта робіцца, прызначыць? Кожны варты спачування, як і кожны адказвае за свае ўчынкі. Самастойна, без ківання на іншага, ці тое чалавек, ці абставіны.
Датычна дэманізацыі (любові) Маці й яе ролі ў сынавым лёсе: ані з таго, што я ўбачыла, як і з таго, што дадалося-дамыслілася цягам спектакля ды развагамі пасля яго, не магу зрабіць такіх высноў. Гэта, бадай, той ілюстрацыйны хайдэгераўскі выпадак, калі мова гаворыць намі. Пры ўсёй веры да анатацыі спектакля, мне не тое што не шкада Жаніха, а неяк нават і спачуванне не праклёўваецца, нягледзячы на яго сапраўды часам кранальную разгубленасць і пацешную нягегласць. Я бачу Жаніха не як асобу, «пазбаўленую ўласнае волі», а як чалавека, які не хоча прымаць рашэнні (гойсанне па стале між мамай і жонкай як пакутлівы выбар між «усім гатовым» і жаданнем самасцвердзіцца, пакіраваць, «быць мужчынам» паводле сацыяльнай мадэлі, у рэшце рэшт). Яшчэ варта дадаць: ягоныя паводзіны не дадаюць дабра і маці. Я бачу Нявесту як падманутую дзяўчыну, якой замест яблыка ўручылі васковы муляж і абураюцца, маўляў, чаму не ясі? чаму не дзякуеш? (Двойчы яна спрабавала вырвацца з гэтага замкнёнага кола — двойчы ёй заступалі дарогу: спачатку грамадства, тыя самыя «людзі» з суполкі «што-людзі-скажуць», з птушкамі-тэлефонамі ў руках ды з драпежнымі вочкамі-агеньчыкамі камер, затым — вецер.)
Адчай і нянавісць — нібы галоўныя пачуцці дзвюх вядучых гераінь, Нявесты і Маці жаніха. Дык што, вінавацім «паралізоўную» матчыну любоў?.. Альбо тут гаворка пра нешта іншае, тое, што мы звыкла — хапаем з паверхні ад ляноты, нежадання думаць-паглыбляцца? — называем любоўю.
Колерава «Шлюб» чорна-белы, але маецца і «чырвоная сцэна», эмацыйна цяжкая, якую распачынае купальская песня з рэфрэнам: «Адна сучка падласа. // Гэта, хлопцы, вам на мяса». Дзяўчына (Гражына Быкава), сляпым выпадкам выбраная сярод дзяўчат «на мяса», уваходзіць на стол-язык, цяпер падсвечаны так, што выдае на сляпучую лямпу ў лабараторыі, зверху, як з жахлівага сну, апускаецца стол-столь, пазбаўляючы нават магчымасці ўцёкаў. Адзін хлопец напаўняе келіх чырвоным віном, яно ліецца цераз край, залівае белую паверхню, іншыя падыходзяць з чаўнамі й разганяюць віно ў бок дзяўчыны, прымушаючы тую нервова і роспачна ўздрыгваць. Потым, як нічога ніякага, хлопцы зноў апранаюць кашулі й пінжакі, а астатнія жанчыны хапатліва і спрактыкавана прыбіраюць стол, змываючы віно-кроў, маўляў, было і было, што ўжо. Будзённасць гвалту — ці ёсць нешта больш вусцішнае за яе? «Ну, гэта не я, цяпер гэта не я...» Ты, мілая, твая маці, сястра, дачка. І раней, і цяпер, і потым. Жорстка? Несправядліва? Традыцыя, завядзёнка, жыццё. «Традыцыйная» жорсткасць пераплятаецца з «традыцыйнай» жа наканаванасцю й пакорай так шчыльна і так шчыра, ажно перыядычна не даеш веры, што гэтак адбываецца ў нашым жыцці. А яно адбываецца, і нат калі «маўклівыя сузіральнікі» не ўхваляюць гэтага, дык жа й не замінаюць.
Што такое тут вецер? Магутная сляпая стыхія? Наканаванне? Лёс, бог, лад жыцця? У абраных для пастаноўкі народных песнях да яго па дапамогу звяртаецца Нявеста ў сірочай песні («Уздыміцеся, буйныя ветры»); менавіта ён, вецер, уласна «расплятае касіцу» згвалтаванай дзяўчыне, і ў калыханцы сыночку замінае спаць таксама ён... Здаецца мне, гэтае пытанне лепей пакінуць без адказу, прынамсі агучанага; пакінуць яго сабе.
«Ці ёсць жыццё пасля спектакляў Карняга?» — выдыхнула мая сяброўка, калі мы выйшлі з тэатра ў мінскую снежаньскую ноч. А я думала пра тое, што традыцыі ствараюць людзі, што няма чалавека, які быў бы як выспа, і што кропля точыць камень не сілай.
Ліда Наліўка