Даўно заўважана, што ў выхаванні музыканта вялікае значэнне мае сама асоба педагога, комплекс яго ўласцівасцей, якія становяцца прыкладам для вучняў. Сапраўды, у гэтай прафесіі вельмі важна не толькі навучыць іграць на інструменце, а і выхаваць мноства чалавечых якасцяў, што адрозніваюць піяніста-рамесніка ад музыканта-інтэлігента.
Прыроджаныя педагогі сярод музыкантаў рэдка сустракаюцца, і іх трэба асабліва шанаваць. Такім выдатным педагогам, безумоўна, з’яўляўся прафесар Беларускай кансерваторыі, заслужаны дзеяч мастацтваў Беларусі Рыгор Шаршэўскі. У яго класе лунаў дух творчасці, натуральнасці, разняволенасці ў думках.
Гутаркі Рыгор Ільіч вёў на роўных — і са школьнікам, і з аспірантам. Пры абмеркаванні пэўнага музычнага фрагмента прафесар заўсёды сядаў да другога раяля, і яго паказ часам аказваўся больш красамоўны, чым славесныя тлумачэнні: адразу адчувалася рука майстра! І колькі б ні працягваўся ўрок, стомы ніхто не заўважаў, паколькі ў атмасферы ўвесь час луналі добразычлівасць, жарты і гумар, а стасункі педагога і вучняў атрымліваліся простыя і натуральныя.
Рыгор Ільіч, чалавек, загартаваны жыццём (у гады Айчыннай вайны ён актыўна ўдзельнічаў у франтавых канцэртных брыгадах), заўсёды шмат і захоплена працаваў, за паўстагоддзя педагагічнай дзейнасці дасягнуў сапраўдных вышынь у прафесіі. У 1988-м мне давялося пагутарыць з паважаным настаўнікам пра ягоны творчы шлях.
— Мая музычная адукацыя распачалася ў 1922 годзе, калі ў дзевяцігадовым узросце пачаў займацца на фартэпіяна. У 1924-м паступіў у музычную школу Растова-на-Доне, скончыў яе праз чатыры гады па класе педагога Гольдберг. У тым жа
1928-м паступіў у музычную вучэльню, якая называлася тады музычным тэхнікумам, у клас педагога Васіля Таўба. У свой час ён вучыўся ў Петраградскай кансерваторыі ў вядомай рускай піяністкі Марыі Барынавай. Пасля заканчэння вучэльні ў Растове-на-Доне ў 1931-м атрымаў накіраванне ў Ленінградскую кансерваторыю і быў залічаны студэнтам восенню таго ж года. Пашанцавала трапіць у клас выдатнага піяніста і педагога прафесара Самарыя Саўшынскага. У яго займаўся да заканчэння кансерваторыі і быў рэкамендаваны ў аспірантуру Ленінградскай кансерваторыі. Там навучаўся па 1939 год. Маімі кіраўнікамі былі прафесар Саўшынскі і выдатны піяніст ХХ стагоддзя Уладзімір Сафраніцкі.
Такія легендарныя імёны ў гісторыі фартэпіяннага мастацтва! І вам пашчасціла кантактаваць з імі... Раскажыце, калі ласка, пра іх педагагічныя прынцыпы і чалавечыя якасці.
— Саўшынскі быў прыроджаным педагогам, выдатна ведаў, як трэба падысці да таго ці іншага студэнта. Як справядліва адзначае прафесар Ленінградскай кансерваторыі Хальфін, які ў яго вучыўся, Самарый Ільіч быў бліскучым дыягностам, добра ведаў, што трэба кожнаму студэнту. А калі наконт Сафраніцкага, то ў яго шмат часу займала выканальніцкая, канцэртная дзейнасць, таму педагогікай ён пачаў займацца позна. Гэта быў вельмі жывы, вясёлы, жыццярадасны чалавек, нягледзячы на тое, што ён выглядаў заўжды паглыбленым у музыку. Любіў каламбуры, жарты, анекдоты. Наогул на ўроках у Сафраніцкага часцей гучала музыка, чым словы. Ён няшмат разважаў, а больш іграў.
Пасля заканчэння аспірантуры ў Ленінградзе я пачаў працаваць у Беларускай дзяржаўнай кансерваторыі. Калі ў 1939-м прыехаў у Мінск, кафедрай загадваў Міхаіл Бергер, і там мелася ўсяго чатыры педагогі: ён сам, Аляксей Клумаў, піяніст і кампазітар, заслужаны артыст рэспублікі (дарэчы, вучань Генрыха Нейгаўза), Зільберберг, якая загінула падчас вайны, і я. На кафедры тады існавала два аддзяленні — выканальніцкае і музычна-педагагічнае. Фактычна я вярнуўся на радзіму сваіх продкаў, паколькі мае бацька, дзед і прадзед былі выхадцамі з Беларусі. Калі казаць пра ўзровень студэнтаў, які я заспеў, то ён мяне прывёў у роспач. Цяперашні ўзровень, вядома, значна вышэйшы, але хацелася б, каб ён яшчэ і яшчэ ўздымаўся. Кантынгент студэнтаў у асноўным з розных гарадоў Беларусі, памяшканне маленькае, зала таксама невялікая, але там праводзілася шмат цікавых канцэртаў. Прычым, паколькі будынка філармоніі тады не было, большасць гастралёраў-музыкантаў, якія прыязджалі з Масквы і Ленінграда, выступалі пераважна ў зале кансерваторыі. Сярод іх згадваю Канстанціна Ігумнава, Генрыха Нейгауза, Аляксандра Гальдэнвейзера.
Пасля вайны кансерваторыя пачала аднаўляцца ў былым Доме губернатара на плошчы Свабоды, тут афіцыйна ўтварылася Спецыяльная школа-дзесяцігодка. Знаходзіліся таксама і музычная школа-сямігодка, і музычная вучэльня, Саюз кампазітараў, які нядаўна ўзнік, а таксама 42-я агульнаадукацыйная школа. Тут жа ў класах жылі і працавалі педагогі.
Каго са студэнтаў, якія скончылі ў вас кансерваторыю, вы асабліва вылучаеце?
— За час выкладання мой клас скончыла каля 50 чалавек. Былі студэнты, якія прыцягнулі пільную ўвагу выдатнымі здольнасцямі; былі тыя, хто меў меншыя прыродныя дадзеныя, але іх надзвычайная працаздольнасць і захопленасць справай прымушалі звяртаць на іх сур’ёзную ўвагу. Сярод маіх выхаванцаў, акрамя піяністаў, адзначу вядомых беларускіх кампазітараў Генрыха Вагнера, Эдзі Тырманд, Ігара Лучанка. Яны займаліся ў мяне па класе фартэпіяна. Шмат маіх выхаванцаў цяпер з’яўляюцца педагогамі кансерваторыі пасля заканчэння аспірантуры ў Ленінградзе, у Маскве або ў Мінску.
Адзін з вашых самых знакамітых вучняў Эдуард Міянсараў стаў лаўрэатам Міжнароднага конкурсу імя Чайкоўскага — раскажыце, калі ласка, пра заняткі з ім.
— Эдзік Міянсараў паступіў да мяне вучыцца ў 1946-м. Хлопчыку ў той час споўнілася 12 гадоў. Яго неверагодная любоў да музыкі, здольнасць бесперапынна ўдасканальвацца зрабілі сваю справу. Ён скончыў нашу адзінаццацігодку ў 1954-м і пасля гэтага займаўся ў Маскоўскай кансерваторыі ў класе выдатнага піяніста Льва Аборына. Студэнтам 4 курса кансерваторыі ён заваяваў званне лаўрэата 1-га конкурсу імя Чайкоўскага. Так што ў дачыненні да гэтага хлопчыка мой прагноз, можна сказаць, цалкам апраўдаўся. Будучы вучнем,
Эдуард на працягу літаральна паўтара гадоў зрабіў такія зрухі ў сваім выканальніцтве, што нават музыканты не паверылі, пакуль не пачулі, як ён іграў пры паступленні ў школу — і пазней. У 14 гадоў ён з бляскам выконваў Мі-бемоль-мажорны канцэрт Ліста, у школе іграў Першы канцэрт Рахманінава і «Іспанскую рапсодыю» Ліста. Так што ў Маскоўскую кансерваторыю ён прыйшоў узброеным. Вядома, з такімі вучнямі звязаныя прыемныя моманты ў жыцці, а педагагічны працэс прыносіць вялікае задавальненне.
Каго з вядомых піяністаў і за што вы шануеце?
— Мне вельмі імпануюць, калі можна так выказацца, найбуйнейшыя расійскія піяністы Святаслаў Рыхтэр, Эміль Гілельс, Якаў Фліэр; цаню здольнасці Дзмітрыя Башкірава. Велізарнае ўражанне пакідае Таццяна Нікалаева, высокаінтэлектуальны музыкант, адна з нямногіх знаўцаў і інтэрпрэтатараў творчасці Баха. З замежных піяністаў старэйшага пакалення назаву Артура Рубінштэйна, Альфрэда Карто.
Ці любілі вы іграць на эстрадзе і якім аўтарам аддавалі перавагу?
— Такія выступленні былі маёй запаветнай марай. Выступаць на эстраднай сцэне было хвалююча і разам з тым цікава. Пытанне пра любімых аўтараў даволі складанае. Назваць адно імя немагчыма. Любімымі кампазітарамі з’яўляюцца Бах, Бетховен. З рамантыкаў — Шуберт, Шуман і Шапэн. З рускіх аўтараў — Чайкоўскі і Рахманінаў.
Час ідзе, густы мяняюцца, але гэтыя аўтары па-ранейшаму застаюцца маімі любімымі, да іх можна дадаць таксама Сяргея Пракоф’ева і Дзмітрыя Шастаковіча.
Рыгор Ільіч, што можаце сказаць пра ўласныя педагагічныя прынцыпы?
— Калі прыехаў у Мінск, дык быў маладым і не надта вопытным педагогам. Тады вырашыў, што мне трэба прайсці гэты шлях як мага хутчэй і стаў даваць сваім вучням творы, якія сам ніколі не іграў. Тым самым маё ўяўленне пра рэпертуар зрабілася значна шырэйшым, і да гэтай думкі мяне падштурхнулі студэнты. Так што яны — таксама мае настаўнікі...
***
З класа Рыгора Шаршэўскага выйшла нямала яркіх музыкантаў: удалыя сольныя кар’еры зрабілі лаўрэат міжнародных конкурсаў Эдуард Міянсараў і заслужаная артыстка Беларусі Ірына Шуміліна, вядомымі канцэртмайстрамі сталі заслужаныя артысткі Беларусі Ларыса Талкачова і Ларыса Максімава, значных поспехаў на педагагічнай ніве дасягнула прафесар Валянціна Рахленка, нямала каштоўнага зрабіў Уладзімір Кузменка на пасадзе дырэктара Гімназіі-каледжа пры Акадэміі музыкі. Некаторыя былыя студэнты дзеляцца ўспамінамі пра свайго педагога.
Узгадвае народны артыст СССР, вядомы кампазітар Ігар Лучанок. Ягоны маналог запісаны таксама ў 1988 годзе.
— Музыкай я пачаў займацца позна. У шостым класе трапіў у школу-адзінаццацігодку пры кансерваторыі, дзе вучыўся на цымбалах, а таксама на агульным фартэпіяна. На цымбалах займаўся рупліва і рабіў поспехі, а з фартэпіяна аказалася больш складана. Вельмі любіў гэты інструмент і хацеў дагнаць тых юнакоў і дзяўчат, якія займаліся разам са мной, але ігралі лепш за мяне. Памятаю, Рыгор Ільіч вельмі цёпла да мяне ставіўся і сказаў, што я магу дагнаць астатніх, аднак для гэтага трэба яшчэ раз пазаймацца ў 9-м класе. Таму стаў «другагоднікам» і перайшоў у клас Шаршэўскага.
Скончыў школу як цымбаліст і як піяніст, у кансерваторыю паступіў па кампазіцыі ў клас Анатоля Багатырова, а па фартэпіяна да Рыгора Шаршэўскага. Лічу, што Рыгор Ільіч — адзін з нямногіх музыкантаў, якія далі мне шмат. Як кампазітар свабодна валодаю фартэпіяна, часта выступаю перад слухачамі, іграю не толькі песні, але і сваю інструментальную музыку — Санату для фартэпіяна, Прэлюдыі для фартэпіяна. Так што я шчаслівы: лёс пазнаёміў з такім выдатным музыкантам і чалавекам. Удзячны Рыгору Ільічу за сяброўства і за ўсё, што ён мне даў як прафесіяналу.
***
Найбольш поўна поспехі педагагічнай сістэмы Рыгора Шаршэўскага выявіліся ўсё-такі не ў кампазітараў, а ў піяністаў. Далёка не кожны прафесар можа пахваліцца, што з яго класа выйшаў лаўрэат прэстыжнага Міжнароднага конкурсу імя Чайкоўскага, а Рыгор Ільіч даў старт менавіта такому музыканту.
Інтэрв’ю з Эдуардам Міянсаравым было запісанага ў 1995-м, калі ён прыязджаў у Мінск на святкаванне 60-гадовага юбілею роднай школы:
— Я нарадзіўся ў музычнай сям’і: бацька — драматычны тэнар, маці — вядомы беларускі канцэртмайстар, заслужаная артыстка рэспублікі Тамара Вартанаўна Міянсарава, якая ўсё жыццё працавала з вакалістамі. Здавалася, я павінен быў набрацца ў іх розуму, але бацькам не хапала часу займацца са мной, я быў прадстаўлены сабе. Калі паступіў у Мінску ў музычную школу-дзесяцігодку пры кансерваторыі, не вельмі хацелася іграць на раялі.
Пачаў «прачынацца», толькі калі трапіў у клас Рыгора Ільіча. Дзівоснай культуры чалавек, неверагоднай чуласці, высокай інтэлігентнасці. У яго немагчыма было не займацца як след! Думаю, у іншых умовах мне не ўдалося б дасягнуць такіх вынікаў: зрабіў тое, што зрабіць практычна немагчыма, бо пралікі піяністычнага дзяцінства — сур’ёзная рэч. І я пачаў наганяць упушчанае. Маці з цяжкасцю адцягвала мяне ад раяля, бо часам забываў пад’есці. Паставіў за мэту сыграць Бетховена ў 13 гадоў, у 14 гадоў — Ліста, у 15 — Другі канцэрт Рахманінава. Калі Шаршэўскі сказаў, маўляў, Рахманінава іграць ранавата, я адказаў, што буду, і зрабіў гэта. За ўсё, чаму ён мяне навучыў, — бясконцая падзяка дарагому і шаноўнаму педагогу.
***
Не адно дзесяцігоддзе паспяхова працуе салісткай сталічнай філармоніі заслужаная артыстка Рэспублікі Беларусь Ірына Шуміліна. Вось што яна ўспамінае:
— Стасункі з такім музыкантам, як Рыгор Ільіч, магу назваць падарункам лёсу. Ён — чалавек у самым праўдзівым і высокім значэнні слова. Незвычайна інтэлігентны, мяккі, тонкі, добразычлівы, але і вельмі патрабавальны да вучняў. З вялікай цікавасцю і велізарнай карысцю для сябе наведвала яго ўрокі. Яго педагагічнае майстэрства заключалася ў тым, што ён умеў раскрыць індывідуальнасць кожнага вучня, развіць яго творчую самастойнасць. У нашым класе панавала цёплая атмасфера, заснаваная на ўзаемнай павазе адно да аднаго. Усе, хто займаліся ў мой час у Рыгора Ільіча, імкнуліся як мага лепш падрыхтаваць свае праграмы і не падвесці педагога.
Клас у Шаршэўскага быў вельмі моцны, праграмы складаныя. Рыгор Ільіч рыхтаваў нас, разлічваючы, што будзем займацца выканальніцтвам. Мы часта выступалі на канцэртнай эстрадзе, выязджалі ў іншыя гарады, ігралі на класных вечарах, выступалі на шматлікіх конкурсах. Калі я скончыла кансерваторыю і пачалося маё гастрольнае жыццё, неаднойчы ўспамінала пра тое, што бачыла і чула на ўроках у свайго выдатнага педагога. Гэта і цяпер дапамагае мне ў канцэртнай дзейнасці. Да свайго настаўніка стаўлюся з вялікай павагай, вялікай любоўю і дзякую за ўсё, што ён для мяне зрабіў.
Ірына Мільто
Аляксандр Мільто