Галерэя сучаснага мастацтва звычайна асацыюецца ў людзей з менавіта маладымі творцамі, найноўшымі тэхнікамі, актуальнасцю, таму наўрад ці хто чакае ўбачыць мастакоў, чыя маладосць прыйшлася на савецкі час, яны застаюцца па-за межамі ўвагі і ўспрымання. Такая дыскрымінацыя мастацтва і чалавека стала першапрычынай выставы. Працэсам кіравала жаданне паказаць творцу, чыя асноўная дзейнасць выпала на 1960—80-я і які застаецца актыўным і сёння. Рэтраспектыва Генадзя Грака як пераможцы конкурсу канцэпцый недыскрымінацый стала часткай праекта «Кастрычніцкая: усё ўключана! усе ўключаны!», што падымае сацыяльныя і ўзроставыя пытанні, звяртае ўвагу людзей на гвалт, прадузятасць і несправядлівасць у соцыуме, а значыць, і ў мастацтве
Для выставы аўтар Генадзь Грак і куратар Уладзімір Грамовіч спецыяльна знайшлі старыя матрыцы, і выявілася, што некаторыя працы, якія рабіліся маленькім тыражом як ілюстрацыі ў розныя выданні, былі надрукаваны ўпершыню з савецкіх часоў. Іншыя — досыць вядомыя творы, напрыклад выкарыстаныя для афармлення кніжкі Уладзіміра Караткевіча «Хрыстос прызямліўся ў Гародні», што сталі дыпломнай работай мастака і былі надрукаваныя з тэкстам праз тры гады пасля стварэння. На выставе гледачы нібы акунаюцца ў далёкі час, знаёмяцца з рэдкай сёння тэхнікай лінагравюры, для якой патрабуецца цвёрдая рука і дакладнае разуменне, як павінна выглядаць выява ў выніку.
Падчас стварэння фарба накатваецца на матрыцу, а не ўглыб, як у афорце, які пры патрэбе можна ператравіць, а значыць, любы непрадуманы рух можа сапсаваць усю працу над гравюрай. Тое, што можна назіраць на выставе, — толькі маленькая частка, апошні этап складанай і дбайнай работы мастака, але, на жаль, тэхніка, якую выкарыстоўвае Грак, сёння страчвае папулярнасць.
Можна заўважыць, што работы, выстаўленыя ў галерэі, не маюць аніякіх подпісаў, бо экспазіцыя разбітая на сэнсавыя блокі, да таго ж вялікая колькасць назваў згубілася з часам. Аднак кожны можа адчуць па саміх лініях і матэрыяле, што закладзена ў працу. Неяк пафасна, але не рамка абмяжоўвае твор, а ягоная назва, таму тэмы, якія закранаюць гравюры Грака ці нават могуць закранаць, досыць разнастайныя.
«Выстава «Прытрымлівацца бела-чорнай лініі» адлюстроўвае час, розную тэмпаральнасць, яна ілюструе палітыку, персанальны шлях мастака і яго ўпісанасць у глабальную і лакальную гісторыю. Адкрыта падымаецца праблема бракавання ўдумлівага гледача і прафесійнага мастацтвазнаўца, — тлумачыць куратар выставы Уладзімір Грамовіч. — Беларускае савецкае мастацтва ў мяне заўсёды выклікала цікавасць, і чым больш праходзіла часу, тым больш з’яўлялася разуменне, што яго трэба згадваць ці нават адкрываць нанова. Існуюць шмат невядомых ці проста незаўважаных аўтараў, якія патрабуюць артыкуляцыі. Год таму мы з Генадзем удзельнічалі ў першай выставе галерэі «Ў» на новым месцы, для якой ён стварыў у класічнай савецкай тэхніцы выяву Новага музея сучаснага мастацтва ў Нью-Ёрку — адбылася апрапрыяцыя стылем і стала незразумела, гэта новы будынак альбо стары.
Аляксандра Піліповіч-Сушчыц
Мы хацелі нагадаць пра мастака і пра яго майстэрства, выставіць яго на тэрыторыі сучаснага мастацтва, што важна, бо кантэкст мяняе і змест выставы. У Нацыянальным музеі творы выглядалі б стандартызавана і неактуальна — тут жа яны набываюць новае прачытанне, экспазіцыя дае магчымасць іншымі вачыма зірнуць на сучаснасць».
Тэмы дыскрымінацыі і талерантнасці падымаюцца ў грамадстве ўсё часцей, але кардынальных зменаў у «дарослым» арце чакаць не даводзіцца. Што можна зрабіць? Задацца пытаннямі, якое месца мастакі савецкага часу займаюць у краіне і як ставіцца да таго мастацтва сёння.